Хәлқара кәчүрүм тәшкилати берманиң роһеңга йезилирини системилиқ көйдүрүватқанлиқини билдүрди

Мухбиримиз әркин
2017-09-15
Share

Хәлқара кәчүрүм тәшкилати бүгүн берма аманлиқ күчлириниң роһеңга мусулманлириниң йеза-кәнтлирини "пиланлиқ түрдә системилиқ көйдүрүватқанлиқи" ға даир дәлилләргә еришкәнликини билдүрди.

Берма һөкүмити роһеңга мусулманлириниң йеза-кәнтлирини көйдүргәнликини рәт қилип, бу җайларға "роһеңгаларниң өзлири от қоюп бериватиду" дегәнләрни илгири сүрмәктә.

Бирләшмә агентлиқиниң билдүрүшичә, хәлқара кәчүрүм тәшкилати җүмә күни от қоюп көйдүрүветилгән 80 йеза-кәнтниң син көрүнүши, сүний һәмраһ сүрити, гуваһчиларниң гуваһлиқи вә башқа мәлуматлар асасида тәйярлиған анализ доклати елан қилған.

Хәлқара кәчүрүм тәшкилатиниң кризис ишлириға мәсул хадими тирана һасан бирләшмә агентлиқиға бәргән баянатида, "дәлилләр рәт қилғусиз дәриҗидә күчлүк. Берма аманлиқ күчлири роһеңга хәлқини нишанлиқ һалда бермадин қоғлап чиқириш һәрикити давамида шималий раһен штатида от қоюш вәқәлирини пәйда қилди," дегән.

Тирана һасан йәнә берма аманлиқ күчлириниң роһеңга йеза-кәнтлирини қоршап, қечиватқан хәлқни оққа тутқанлиқи, андин уларниң өй- маканлириға от қоюп бериватқанлиқини билдүрүп, "бу қануний термин билән ейтқанда, инсанлиққа қарши җинайәт," дәп көрсәткән.

Берма һөкүмити роһеңгаларниң берма пуқраси икәнликини изчил рәт қилип, уларға қарши елип бериватқан һәрикитини ақлап кәлгән. Һалбуки, б д т кишилик һоқуқ комиссари раад әл-һөсәйин вә б д т баш катипи антонийо гутерес, берма даирилириниң қилмишини "етник тазилаш" дәп әйиблиди. Б д т ниң билдүрүшичә, һазир белгалға қечип чиққан роһеңга мусапирлириниң сани 400 миңға йәткән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт