Xelq'ara kechürüm teshkilati bérmaning rohéngga yézilirini sistémiliq köydürüwatqanliqini bildürdi

Muxbirimiz erkin
2017-09-15
Élxet
Pikir
Share
Print

Xelq'ara kechürüm teshkilati bügün bérma amanliq küchlirining rohéngga musulmanlirining yéza-kentlirini "Pilanliq türde sistémiliq köydürüwatqanliqi" gha da'ir delillerge érishkenlikini bildürdi.

Bérma hökümiti rohéngga musulmanlirining yéza-kentlirini köydürgenlikini ret qilip, bu jaylargha "Rohénggalarning özliri ot qoyup bériwatidu" dégenlerni ilgiri sürmekte.

Birleshme agéntliqining bildürüshiche, xelq'ara kechürüm teshkilati jüme küni ot qoyup köydürüwétilgen 80 yéza-kentning sin körünüshi, sün'iy hemrah süriti, guwahchilarning guwahliqi we bashqa melumatlar asasida teyyarlighan analiz doklati élan qilghan.

Xelq'ara kechürüm teshkilatining krizis ishlirigha mes'ul xadimi tirana hasan birleshme agéntliqigha bergen bayanatida, "Deliller ret qilghusiz derijide küchlük. Bérma amanliq küchliri rohéngga xelqini nishanliq halda bérmadin qoghlap chiqirish herikiti dawamida shimaliy rahén shtatida ot qoyush weqelirini peyda qildi," dégen.

Tirana hasan yene bérma amanliq küchlirining rohéngga yéza-kentlirini qorshap, qéchiwatqan xelqni oqqa tutqanliqi, andin ularning öy- makanlirigha ot qoyup bériwatqanliqini bildürüp, "Bu qanuniy términ bilen éytqanda, insanliqqa qarshi jinayet," dep körsetken.

Bérma hökümiti rohénggalarning bérma puqrasi ikenlikini izchil ret qilip, ulargha qarshi élip bériwatqan herikitini aqlap kelgen. Halbuki, b d t kishilik hoquq komissari ra'ad el-höseyin we b d t bash katipi antoniyo gutérés, bérma da'irilirining qilmishini "Étnik tazilash" dep eyiblidi. B d t ning bildürüshiche, hazir bélgalgha qéchip chiqqan rohéngga musapirlirining sani 400 minggha yetken.

Toluq bet