B d t bash katipi bérmani rohin'ga musulmanlirigha qaritilghan zorawanliqqa xatime bérishke chaqirdi

Muxbirimiz erkin
2017-09-29
Share

B d t bash katipi antoniyo gutérrés peyshenbe küni b d t xewpsizlik kéngishide doklat bérip, bérma rehberlirini uning herbiy basturushidin qachqan rohin'ga musulmanlirining "Qabahetlik" ehwaligha xatime bérishke chaqirdi.

B d t musapirlar mehkimisining bildürüshiche, bérma armiyesi bu yil awghustning axirliridin bashlap rohin'ga musulmanlirini keng kölemlik tazilashqa kirishkendin buyan yérim milyondin artuq musulman bén'galgha qéchip barghan.

Ötken hepte b d t bash katipi gutérrés we kishilik hoquq aliy komissari ra'ad el hüseyin, bérma da'irilirining herikitini "Étnik tazilash" dep jakarlighan.

Xewpsizlik kéngishi komissari ra'ad el hüseyinning bu sözge chüshenche bérishini telep qilghan idi.

Antoniyo gutérrés xewpsizlik kéngishide qilghan sözide, bérmadiki "Weziyet dunyadiki eng téz tereqqiy qiliwatqan musapirlar mesilisige, yeni bir qabahetlik insanperwerlik we kishilik hoquq mesilige aylandi" dégen.

Yighinda, bérma da'irilirining eng qattiq tenqid qilghan terep amérikaning b d t turushluq elchisi nikki haléy boldi. U, bérma da'irilirini "Dawamliq rehimsizlerche heriket élip bérip, bérmadiki az sanliq milletni tazilash" bilen eyibligen we buning ‏bérma rehberlirige nisbeten "Nomus qilarliq ehwal" ikenlikini bildürgen.

Lékin yighinda xitay bilen rusiye bérma hökümitini qollighan. Xitayning b d t da turushluq wekili wu xeytaw "Xelq'ara jem'iyet bérma hökümiti duch kelgen qiyinchiliqlargha diqqet qilishi, sewrchan bolup, özining yardimini qilishi kérek" likini tekitligen.

Rusiye b d t da turushluq elchisi wasiliy nébénziya, "Biz étnik tazilash, irqiy qirghinchiliq, dégen sözlerni ishletkende éhtiyat qilishimiz" dégen.

Xelq'ara kishilik hoquq közitish teshkilati ilgiri xewpsizlik kéngishini rohin'ga krizisida sörelmilik qilish bilen tenqidligen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet