Bérmuda sabiq bash ministiri: Uyghurlarni qobul qilip toghra qilghinimdin pexirlinimen

Muxbirimiz shöhret hoshur
2017-06-22
Share

Bérmuda royal géziti bügün, güentanamodin qoyup bérilgen 4 neper Uyghurning bérmudagha orunlashqanliqining 8 yilliqi munasiwiti bilen bérmudaning sabiq bash ministiri éwart brown ependini ziyaret qilghan.

Éwart brown eyni chaghda 4 Uyghurni qobul qilish jeryanida aqsaray bilen ötküzgen mexpiy söhbetler we bérmudada meslekdashliri bilen qilishqan talash-tartishlarni eslep ötkendin kéyin, özining eyni chaghdiki bu töt Uyghurni qobul qilish qararigha bügün pushayman qilmayla qalmastin, belki iptixarlinidighanliqini bildürgen.

Sabiq güentanamo tutqunliridin abdulla abduqadir, salahidin abdul'ehed, xélil mamut we ablikim turaxun, 2009-yilining otturiliri bérmudagha orunlashturulghan idi. Bularning gunahsiz halda güentanamoda 8 yil yatqanliqi, bérmudagha kelgendin buyanqi ishchan we intizamchanliqi heqqide tesiratini bayan qilghan éwart brown: "Eger hökümette yene bir nöwet wezipem bolghan bolsa, amérika we britaniye terep bilen sözliship, bulargha yardem qilish üchün yene bir tiriship baqqan we adalet jehettiki kemtüklüklerning toluqlinishigha küchep baqqan bolattim" dégen.

Güentanamoda tutup turulghan 22 Uyghur mesiliside xitay xelq'arada uzun mezgil selbiy teshwiqat élip barghan, ularning tinchliqqa tehdit ikenlikini ilgiri sürüp döletlerning qobul qilmasliqini tewsiye qilghan we amérikidin ularni özlirige qayturup bérishni telep qilghan. Amérika xitayning telipini ret qilip, güentanamodiki Uyghurlarni albaniye, bérmuda, palaw we salwador qatarliq döletlerge orunlashturghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet