Бермудадики уйғурларға паспорт берилди

Мухбиримиз әзиз
2018-08-28
Елхәт
Пикир
Share
Принт

2009-Йили гуантанамодики һәрбий түрмидин қоюп берилип, бермудаға орунлаштурулған хелил мамут, абдулла абдуқадир, абликим турахун вә салаһидин абдуләһәд қатарлиқ төт уйғур аридин тоққуз йил өткәндә, йәни 27-авғуст күни бермуда паспорти тарқитип берилгән. Шуниңдин буян уларниң қануний салаһийити болмаслиқ тарихи ахирлашқан.

Әйни вақитта америка һөкүмити бу уйғур мәһбусларни «хата вақитта хата орунда қолға чүшүп қалған, улар дүшмән җәңчиси әмәс» дәп азадлиққа чиқарған һәмдә бермудаға йәрләштүргән иди. Әмма уларға пуқралиқ берилмигән болғачқа бу уйғурлар изчил салаһийәтсиз кишиләрдин болуп кәлгән иди.

Бермуданиң сабиқ баш министири еварт бравн бу һәқтә сөз қилип: «бу бир яхши башлиниш. Әмма уларниң пуқралиққа еришиши бәкму узунға созулуп кәтти» дегән.

Мәлум болушичә, бу қетим уларға берилгини «биританийәниң чәтәлдики земининиң пуқраси» салаһийити болуп, уларға бермуда паспорти берилидикән. Бу хил паспортниң игилири бермуда аһалисигә охшаш һоқуқларға игә болидикән, әмма уларниң сайламда беләт ташлаш һоқуқи болмайдикән. Қанун бойичә, уларниң 18 яшқа толмиған пәрзәнтлириму мушу йосунда йеңи паспорт алидикән. Бу паспортниң йәнә бир алаһидилики, бу уйғурлар биританийә пуқралириға охшаш һоқуқларға игә болидикән һәмдә әнглийәниң һәрқандақ йеридә яшиса болуверидикән.

Пикирләр (0)
Share
Толуқ бәт