Байден һөкүмити хитайниң сөзи билән һәрикитиниң бирдәк болушини үмид қилидикән

Мухбиримиз җәвлан
2021-03-17
Share

Ройтрес агентлиқиниң 16-март хәвәр қилишичә, американиң юқири дәриҗилик әмәлдарлири хитай билән бу һәптә "техиму қаттиқ чариләрни оттуриға қоюп" сөһбәт өткүзидиғанлиқини, хитайдики кишилик һоқуқ мәсилисини өз ичигә алған бир қатар мәсилиләргә алаһидә көңүл бөлидиғанлиқини ейтқан.

Хәвәрдә ейтилишичә, америка әмәлдарлири бу һәптиниң 4-күни хитай билән аляскида өткүзүлидиған сөһбәт һәққидә қисқичә мәлумат бәргән болуп, американиң бу қетимлиқ көрүшүш арқилиқ хитай билән болған мунасивәтни яхшилашқа тиришидиғанлиқини, буниң үчүн хитайниң қуруқ гәп қилмай, әмәлий һәрикәт қоллинишини үмид қилидиғанлиқини билдүргән.

Аляскиниң әнкриҗ шәһридә өткүзүлидиған бу қетимлиқ сөһбәт байден һөкүмитиниң хитайниң юқири дәриҗилик әмәлдарлири билән өткүзидиған тунҗи қетимлиқ йүз туранә сөһбити болуп, америка ташқи ишлар министири антони билинкен билән президент байдинниң дөләт бихәтәрлики мәслиһәтчиси җек саливен хитайниң ташқи ишларға мәсул баш әмәлдари яң җечи вә хитай ташқи ишлар министири ваң йи билән көрүшидикән.

Көзәткүчиләрниң қаришичә, хитай америка билән болған мунасивәтни яхшилашни тәкитләп кәлгән болсиму, қуруқ гәптин башқа һечқандақ әмәлий иш қилмиған. Америка бу қетимлиқ сөһбәттә уйғурлар мәсилиси вә хоң коң мәсилисини оттуриға қоюп, хитайдин һазирқи йөнилишини өзгәртип, конкрет һәрикәт қоллинишни тәләп қилидикән, әгәр хитай йәнә ялған сөзләп өткәлдин өтүвелишни ойлиса, бу сөһбәтму нәтиҗисиз болидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт