Байден һөкүмити хитайниң зиянлиқ сода адәтлиригә тақабил туруш үчүн йәниму көп тәдбир қоллинидиғанлиқини вәдә қилған

Мухбиримиз ирадә
2021-04-01
Share

"политико" гезитиниң хәвәр қилишичә, 31-март күни байден һөкүмити хитайни "һәддин зиядә полат-төмүр, алюмин вә қуяш енергийә тахтиси ишләп чиқирип, йәр шаридики артуқчә ишләпчиқиришқа сәвәб болуватқан әң чоң дөләт," дәп тәнқид қилған вә хитайниң "бу зиянлиқ сода адитини һәл қилиш" үчүн йәниму көп һәрикәт қоллинидиғанлиқи тоғрисида вәдә бәргән.

Юқириқи сөзни америка сода вәкиллири ишханиси өзиниң ташқий содидики тосалғулар тоғрисидики йиллиқ доклатиниң бир қисми сүпитидә оттуриға қойған болуп, доклатниң хитайға аит қисми 30 бәттин ашидикән.

Доклатта мундақ дийилгән: "хитайниң дөләт рәһбәрликиниң иқтисад вә содиға тутқан позитсийиси уни дуняда артуқчә иқтисадий көләм пәйда қиливатқан алдинқи қатардики җинайәтчигә айландурди. Полат-төмүр, алюмин, қуяш енергийәси қатарлиқ бир қанчә кәсиптики еғир әһваллар буниң испати."

Сода ишханиси доклатида йәнә хитай һөкүмитиниң нәччә йүз милярд доллар мәбләғ чиқирип, хитай ширкәтлирини қоллаш вә улардин дөләт ичидики базар өлүши үчүн алдин бекитилгән нишанни әмәлгә ашурушни тәләп қилиш арқилиқ башқа саһәләрдиму еғир дәриҗидики артуқчә ишләпчиқириш пәйда қилиш йолиға қарап меңиватқанлиқини агаһландурған. Шундақла хитайниң бундақ зиянлиқ сода адитини һәл қилиш үчүн икки тәрәплик вә көп тәрәплик тиришчанлиқини давамлаштуридиғанлиқини билдүргән.

"политико" гезитиниң ейтишичә, байден һөкүмитиниң бу кәскин позитсийәси америка-хитай сода мунасивәтлириниң бундин кейинму раван болмайдиғанлиқиниң ипадиси икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт