Байден һөкүмити хитайниң уйғурларға қаратқан қорқунчлуқ дәпсәнчиликигә қарита бесимни күчәйтидиғанлиқини билдүргән

Мухбиримиз әркин
2022-05-13
Share

Америка ташқий ишлар министирлиқи йеқинда дөләт мәҗлисигә йоллиған доклатида, хитайниң уйғурларға қаратқан қорқунчлуқ дәпсәндичиликигә қарита бесимни күчәйтидиғанлиқи, американиң һоқуқи вә байлиқ мәнбәсини ишлитип, мәҗбурий әмгәкни тохтитидиғанлиқини билдүргән. Америка “блумберг хәвәрлири” агентлиқиниң хәвәр қилишичә, америка ташқий ишлар министирлиқи “сәзгүр, әмма мәхпий әмәс” дәп бәлгә қоюлған доклатида, американиң ирқий қирғинчилиққа учриған ‍уйғурлар дуч кәлгән муамилигә болған әндишилирини қандақ оттуриға қоюдиғанлиқини чүшәндүргән.

Доклатта ейтилишичә, бу мәсилиниң башқа дөләтләр, санаәтләшкән 7 дөләт гуруһи вә хусуси ширкәтләр билән болған йиғинларда оттуриға қоюлидикән. Доклатта “америка һөкүмити шинҗаңдики мәҗбури әмгәккә қарши турушта өзиниң һоқуқи вә байлиқ мәнбәсини толуқ қоллиниду” дейилгән. Доклатта болупму “қаттиқ назарәт, мәҗбурий нупус контрол қилиш тәдбирлири, балиларни аилисидин айриветиш, кәң көләмлик тутқун, қийин-қистақ вә мәҗбурий етник вә диний ассимилатсийәгә қарши туридиғанлиқи” тәкитләнгән.

“блумберг хәвәрлири” ниң ейтишичә, “шинҗңға мәркәзлишиш-американиң дуняниң һәрқайси җайлиридики иттипақдашлирини вә шериклирини йиғип, русийәни дипломатик қоллаш вә хоңкоңдики демократийәни бастурушни өз ичигә алған бир қатар мәсилиләрдә хитайға бесим ишлитиш үчүн көрсәткән тиришчанлиқиниң бир парчиси” икән.

Доклатта йәнә американиң уйғур елидики мәҗбурий әмгәктин пайдилинидиған ширкәт вә аппаратларни ениқлап чиқидиғанлиқи, ширкәтләр билән һәмкарлишип, “тәминләш зәнҗиридә сәгәк болидиғанлиқи, пүтүнләй яки қисмән болсиму шинҗаңдики мәҗбурий әмгәктә қезилған, ишләпчиқирилған яки ясалған мәһсулатларниң америкаға киришиниң алдини алидиғанлиқи” тәкитләнгән. Бу америка һөкүмитиниң тунҗи қетим уйғурлар мәсилисидә қандақ сиясәт тутудиғанлиқини әтраплиқ вә конкирет чүшәндүрүшидур.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт