Jow baydén:“Rozi héytni ötküzelmeywatqan Uyghurlarni untumaymiz!”

Muxbirimiz eziz
2022.05.03

Pütün dunya musulmanliri üchün eng zor xushallinarliq künlerdin boluwatqan rozi héyt küni axshimi amérika prézidénti jow baydén aqsarayda ötküzülgen rozi héytni tebriklesh ziyapitide Uyghurlarni alahide tilgha aldi. Shuningdek özining ulargha bolghan héytliq salimini yollidi.

Jow baydéning tiwittér bétide élan qilin'ghan bu heqtiki uchurlarda éytilishiche, dunyaning herqaysi jayliridiki musulmanlar ammisi duch kéliwatqan türlük basturushlarni eyiblesh hemde özlirining musulmanlar dunyasigha bolghan izgü tileklirini ipadilesh üchün aqsarayda mexsus chong kölemlik héytliq ziyapet teyyarlan'ghan. Melum bolushiche, bu ziyapetke amérika Uyghurliridin xelq'ara diniy erkinlik komitétining mu'awin re'isi nuri türkel hemde türmige qamalghan Uyghur doxtur gülshen abbasning muhajirettiki perzenti ziba murat teklip boyiche  qatnashqan. Jow baydén ziyapette alahide söz qilip: “Nöwette dunyaning herqaysi jaylirida musulmanlar ammisi zorluq hujumlirining we diniy basturushlarning obyékti bolup qéliwatidu. Bügün biz ashu xildiki musulmanlardin rozi héyt ‍ötküzüshkimu qadir bolalmaywatqan Uyghurlarni we rohin'galarni chin qelbimizdin yad étimiz” dégen.

Xewerde baydénning sözliridin neqil alghan halda amérika tewesidiki musulmanlarning amérika dölitining téximu qudret tépishi üchün hesse qoshuwatqanliqidek ré'alliqqa alahide teshekkür éytilghan. Shuning bilen birge baydén hökümiti dewride musulmanlardin bolghan rashad höseyinning tunji qétim amérika hökümitining xelq'ara diniy erkinlik bash elchilikige teyinlen'genlkini alahide tilgha alghan.

Xewerde éytilishiche, amérika hökümitining mu'awin prézidénti kamala xarismu shu küni özining tiwittér bétide pütün dunyadiki musulmanlar jama'itige özining héytliq salimini yollighan hemde “A'ilimizdin pütün dunya musulmanlirigha salam: héyt mubarek!” dégen.

Xitay hökümiti Uyghurlardiki islam dini bilen baghlan'ghan barliq örp-adetlerning hemmisini “Térrorluq we ashqunluq” qa baghlap irqiy qirghinchiliqni dawam qildurushning bahanisi qiliwatqanda amérika hökümitining bu xildiki rozi héytliq pa'aliyitide Uyghurlar mesilisini alahide tilgha élishi muhajirettiki Uyghurlarni tolimu xursen qilghan ishlardin biri bolup qalghanliqi melum.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.