Prézidént baydin xitay re'is shi jinping bilen téléfonlashqan

Washin'gtondin muxbirimiz irade teyyarlidi
2024.04.02

Amérika aqsarayning bayanat bérishiche, amérika prézidénti jo baydin xitay dölet re'isi shi jinping bilen téléfonda körüshken. 2-Aprél küni etigende prézidént baydin téléfonda xitayning jenubiy déngizda filippin'gha qaratqan qutratquluq herikiti, uning rusiyening ukra'inadiki tajawuzchiliqini qollishi, xongkongning yéngi bixeterlik qanuni we teywen mesilisi qatarliq muhim mesililer boyiche sözleshken.

Melum bolushiche, bu körüshüsh ikki dölet rehbirining yéqinqi ikki yildin buyanqi tunji qétim sözlishishi bolup hésablinidiken.

Ismini ashkarilashni xalimighan bir aqsaray emeldarining radiyomizgha éytishiche, amérika maliye ministiri jenét yéllén aldimizdiki künlerde xitaygha baridiken, undin kéyinki heptilerde amérika tashqi ishlar ministiri antoniy billinkénmu xitayni ziyaret qilidighan bolup, bu téléfon söhbitini bu ziyaretlerdin awwalqi “Yoqlash” dep atashqa bolidiken.

Bu emeldar sözide, baydin bilen shi jinpingning amérika-xitay munasiwetlirini jiddiyleshtürüwatqan mesililer heqqide sözleshkenlikini dégen.

Téxi yéqinda amérika hökümiti xitayning bir tor jasusluq guruppisigha jaza tedbiri qoyghan we uning jasusluq pa'aliyetlirining keynide xitay hökümiti barliqini bildürgenidi.

Amérika aq saray bu téléfon söhbiti heqqidiki bayanatida, ikki rehberning téléfon söhbitining ikki dölet munasiwitini pilanliq idare qilishtin ibaret meqsetke xizmet qilidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.