Baydin bilen shi jinping charshenbe küni san-fransiskoda körüshüp, ikki dölet munasiwitini sözlishidu

Washin'gtondin muxbirimiz erkin teyyarlidi
2023.11.13

Amérika prézidénti jow baydén bilen xitay re'isi shi jinping 15-noyabir charshenbe küni amérikaning san-fransésko shehiride körüshüp, keskinliship kétiwatqan amérika-xitay munasiwetlirini sözlishidu. Nöwette, baydin - shi jinping söhbitining témisi xelq'ara taratqularning eng qiziq nuqtisi bolup qaldi. Her ikkila terep körüshüshtin burun yumshaq keypiyat yaritishqa tirishsimu, lékin amérika emeldarliri körüshüshte ikki dölet munasiwitining bösüsh xaraktérlik ilgirileshke érishishini kütmeydighanliqini bildürüshmekte. Aq saray emeldarlirining qeyt qilishiche, ular bu körüshüshte yetmekchi bolghan asasliq nishanlirining biri, ikki terepning söhbet qanallirini ochuq tutush, ikki dölet arisidiki jiddiylikning toqunushqa aylinip kétishini peseytish iken.

Aq sarayning bayanatchisi kérin zhan pé'iréning körsitishiche, rehberler “Alaqe qanallirini dawamliq ochuq tutushning muhimliqi”, ular arisidiki “Riqabetni mes'uliyetchanliq bilen bashqurush we menpe'etimiz kélishidighan jaylarda, bolupmu chégra halqighan xelq'ara jem'iyetke tesir qilidighan xirislarda qandaq hemkarlishish” ni muzakire qilidiken. Amérika taratqulirining xewerliride, pirézidént baydénning shi jinpingni téhran'gha bolghan tesirini qollinip, uning isra'iliye-xamas toqunushini rayon xaraktérlik toqunushqa aylanduruwétishining aldini élishqa ündeydighanliqi, shundaqla ikki terep söhbet témisining yene kishilik hoquq, teywen boghuzidiki jiddiylik, jenubiy déngiz, shimaliy koréye mesililirini öz ichige alidighanliqi qeyt qilinmaqta.

Roytérs agéntliqining bildürüshiche, söhbette pirézidént baydin shi jinpinggha ikki döletning herbiy alaqisini eslige keltürüsh heqqide bésim ishlitidiken. Aqsarayning dölet xewpsizlik meslihetchisi jek solliwan 12-noyabir yekshenbe küni baydénning xitay bilen herbiy alaqini eslige keltürüshni telep qilidighanliqini éytqan. “Jenubiy xitay etigenlik pochtisi” gézitining ilgiri sürüshiche, baydin bilen shi jinping yene sün'iy eqil téxnikisini ademsiz urush ayropilani, yadro oq béshi qatarliq qorallargha ishlitishni cheklesh heqqide kélishim hasil qilishi mumkin iken. Xewerlerde, shi jinpingning san-franséskoda Uyghurlarni öz ichige alghan kishilik hoquq teshkilatlirining keng kölemlik naraziliqigha duch kélidighanliqi bildürülmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.