Хитай даирилири биңтуән парткоми сиясий-қанун комитетиниң секритарини алмаштурған

Ихтиярий мухбиримиз җәвлан
2022.06.30
Share on WhatsApp
Share on WhatsApp

“хитай сиясий қанун тори” ниң хәвиригә қариғанда,  йеқинда биңтуән партком сиясий-қанун комитети кадирлар омумий йиғини чақирип, биңтуән парткоминиң даимий һәйәт әзаси җу шөбинниң биңтуән сиясий-қанун комитетиниң секритарлиқиға тәйинләнгәнликини елан қилған.

Җу шөбин 19-июн үрүмчидә ечилған биңтуән партком 8-нөвәтлик комитети 1-қетимлиқ йиғинида биңтуән парткоминиң даимий һәйәт әзалиқиға сайланғаникән. Хитай мәтбуатлирида униң 1970-йил туғулғанлиқи вә мәркизий партийә мәктипидә оқуғанлиқидин башқа мәлумат берилмигән.

Мунасивәтлик учурларға қариғанда, җу шөбин илгири қәшқәр, турпан вилайәтлиридә тәшвиқат вә бирликсәп хизмитигә мәсул әмәлдар болған, 2017-йил уйғур аптоном районлуқ партком бирликсәп бөлүминиң муавин башлиқи болған. 2018-Йилдин башлап биңтуән орунлирида һоқуқ тутқан, 2022-йил 6-айда биңтуән парткоминиң даимий һәйәт әзаси, шихәнзә шәһәрлик парткомниң секритари болған.

Хитай мәтбуатлирида ашкариланғинидәк, 2020-йил 7-айда чен чүәнго, җу хәйлун вә биңтуәнниң икки әмәлдари җазаланғандин кейин, хитай ташқий ишлар миниситрлики көп қетим американи әйблигән, әмма йәнила бу әмәлдарларниң көп қисмини алмаштурған. Хитай һөкүмити бу йил 1-айда “шинҗаң ишләпчиқириш-қурулуш биңтуәни” ниң қомандани пең җяруйни йөткәп, униң орниға тарбағатай вилайәтлик парткомниң секритари шө бинни тәйинлигән. Америкадики кишилик һоқуқ адвокати тең бяв бу һәқтә радийомизға қилған сөзидә, биңтуәндики әмәлдар йөткәш вә башқа тәдбирләрниң хитай һөкүмитиниң уйғур райониға болған контроллуқни йәниму күчәйтишни мәқсәт қилғанлиқини билдүргәниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт