Xitay da'iriliri bingtu'en partkomi siyasiy-qanun komitétining sékritarini almashturghan

“Xitay siyasiy qanun tori” ning xewirige qarighanda,  yéqinda bingtu'en partkom siyasiy-qanun komitéti kadirlar omumiy yighini chaqirip, bingtu'en partkomining da'imiy hey'et ezasi ju shöbinning bingtu'en siyasiy-qanun komitétining sékritarliqigha teyinlen'genlikini élan qilghan.

Ju shöbin 19-iyun ürümchide échilghan bingtu'en partkom 8-nöwetlik komitéti 1-qétimliq yighinida bingtu'en partkomining da'imiy hey'et ezaliqigha saylan'ghaniken. Xitay metbu'atlirida uning 1970-yil tughulghanliqi we merkiziy partiye mektipide oqughanliqidin bashqa melumat bérilmigen.

Munasiwetlik uchurlargha qarighanda, ju shöbin ilgiri qeshqer, turpan wilayetliride teshwiqat we birliksep xizmitige mes'ul emeldar bolghan, 2017-yil Uyghur aptonom rayonluq partkom birliksep bölümining mu'awin bashliqi bolghan. 2018-Yildin bashlap bingtu'en orunlirida hoquq tutqan, 2022-yil 6-ayda bingtu'en partkomining da'imiy hey'et ezasi, shixenze sheherlik partkomning sékritari bolghan.

Xitay metbu'atlirida ashkarilan'ghinidek, 2020-yil 7-ayda chén chüen'go, ju xeylun we bingtu'enning ikki emeldari jazalan'ghandin kéyin, xitay tashqiy ishlar minisitrliki köp qétim amérikani eybligen, emma yenila bu emeldarlarning köp qismini almashturghan. Xitay hökümiti bu yil 1-ayda “Shinjang ishlepchiqirish-qurulush bingtu'eni” ning qomandani péng jyaruyni yötkep, uning ornigha tarbaghatay wilayetlik partkomning sékritari shö binni teyinligen. Amérikadiki kishilik hoquq adwokati téng byaw bu heqte radiyomizgha qilghan sözide, bingtu'endiki emeldar yötkesh we bashqa tedbirlerning xitay hökümitining Uyghur rayonigha bolghan kontrolluqni yenimu kücheytishni meqset qilghanliqini bildürgenidi.