Никкий халей: "хитайни ойлисам көзүмдин уйқу қачиду!"

Мухбиримиз әзиз
2021-05-24
Share

Америка һөкүмитиниң бирләшкән дөләтләр тәшкилати (б д т) да турушлуқ сабиқ баш әлчиси никки халей ханим йеқинда америкадики көрүлүш нисбити алаһидә юқури болған "гленбек" радийо-телевизийәсиниң зияритини қобул қилғанда, уйғурлар мәсилиси һәмдә хитайниң дуня хәлқигә әкиливатқан тәһдити тоғрисида алаһидә сөз қилған.

Мәхсус сөһбәттә никкий ханим һәр қетим хитай һөкүмити ядиға кәлсилә көзидин уйқу қачидиғанлиқи һәққидә сөз қилип, хитай һөкүмитиниң нөвәттики ичкий вә ташқий сиясәтлириниң буниңдики асаслиқ сәвәб икәнликини шәрһиләп өткән. Униң баян қилишичә, хитай һөкүмити илгирики вақитларда анчә ғәлвиси йоқ кетиватқан болуп, ши җинпиң һакимийәтни қолға алғандин кейин һәммила нәрсә астин-үстүн болушқа башлиған. Болупму ши җинпиң компартийә низамнамисини өзгәртип "мәңгүлүк падишаһ" болувалғандин кейин, униң бу хил "падишаһлиқи" хәлқара тәшкилатларға, җүмлидин бирләшкән дөләтләр тәшкилатиғичә созулған. Шундақла хитай һөкүмити һәрқайси ‍әза дөләтләрниң "бурниға ноқуп", уларни өзиниң сизған сизиқи бойичә меңишқа қистиған. Әмдиликтә болса улар әқлий мүлүк оғрилиқи һәмдә һәрбий қисимларни заманивилаштурушни ишқа ашурған. Ичкий қисимда болса милйонларчә уйғурни лагерға қамап, уларни инсанниң ядиға кәлмәйдиған вәһшийлик билән қийнашқа ‍өткән. Буниң билән "әмди қайтиланмайду" дегән шоарға еғир хирис пәйда қилған.

У мушу әһвалларни омумлаштуруп: "хитай алдинқи қетимқи олимпик мусабиқисида бир партийә сүпитидә оттуриға чиққан болса, әмдики олимпик мусабиқисида өзлириниң дуняви күч икәнликини намайән қилмақчи болуватиду. Әгәр бизниң буниң билән каримиз болмай ишлар мушундақ кетивәрсә, улар узунға қалмай тәйвәнни алиду. Тәйвәнни алғандин кейин болса, хитай пүтүн дуняни ютушниң койиға чүшиду," дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт