Уйғур аптоном райониниң бир қисим һоқуқи биңтуәнгә өткүзүп берилгән

Мухбиримиз әркин
2019-01-07
Елхәт
Пикир
Share
Принт

Уйғур аптоном райониниң аманлиқ ишлириға алақидар бәзи мәмури функсийәлик роли вә қанун иҗра қилиш һоқуқлири өткән йили хитайниң «шинҗаң ишләпчиқириш-қурулуш биңтуәнни» гә тапшуруп берилгән.

Уйғур аптоном райониниң бу һоқуқларни өз ихтиярлиқи билән яки мәркәзниң буйруқи билән биңтуәнгә тапшуруп бәргәнлики мәлум әмәс. Биңтуән ахбарат васитилириниң ашкарилишичә, бу биңтуән ислаһатини чоңқурлаштуруш, биңтуәнни җәнубқа қарап кеңәйтиш пиланиниң бир қисми икән. Бәзи көзәткүчиләр, бу һоқуқларниң биңтуәнгә өткүзүп берилиши уйғурларниң бихәтәрликигә техиму зор хәвп елип келидиғанлиқини билдүрмәктә. «Биңтуән гезити» ниң 7‏-январ хәвиридә ашкарилишичә, биңтуән җамаәт хәвпсизлик органлири 2018‏-йили 2‏-айдин башлап уйғур аптоном райониниң чоң йол қатниши, аманлиқ вә от өчүрүшни башқуруш қатарлиқ 140 хил мәмурий функсийәси вә мәмурий қанун иҗра қилиш, қатнаш сақчиси вә алаһидә сақчи тәшкилләш қатарлиқ һоқуқлирини тапшурувалған. Нөвәттә аманлиқ башқуруш, зәһәр чәкләш, от өчүрүш, тор бихәтәрлики қатарлиқ 80 хил түрни тапшурувелиш рәсмийити тамамланған.

Көзәткүчиләрниң илгири сүрүшичә, уйғур аптоном райониниң 140 хил мәмурий функсийәси вә мәмурий қанун иҗра қилиш һоқуқиниң биңтуәнгә берилиши униң күчини техиму зор дәриҗидә азайтип, биңтуәнниң күчини техиму зорайтидикән. Биңтуәнниң бурунқи рәсмий штати хитай мәркизи һөкүмитиниң уйғур аптоном районида турушлуқ ишләпчиқириш карханиси иди. Лекин хитай һөкүмити 2009‏-йили йүз бәргән үрүмчи «5‏-июл вәқәси» дин кейин қанун чиқирип, униңға бир дәриҗилик мәмурий штат бәргән. Даириләр өткән йилдин башлап биңтуәнни җәнубқа қарап кеңәйтишни оттуриға қойған иди.

«Биңтуән гезити» ниң хәвиридә баян қилинишичә, биңтуән җ х органлири аптоном районниң бир қисим һоқуқлирини тапшурувалғандин кейин кадирлирини җәнубқа йөткилишкә риғбәтләндүрүп, җәнубтики йәрликниң «алдинқи сәп» ишлириға актип қол тиқишқа башлиған.

«Ишләпчиқириш қурулуш биңтуәни» 1954 ‏-йили қурулған болуп, 1974‏-йили йәрликниң ишлириға «тосқун болди» дегән сәвәб билән тарқитиветилгән болсиму, лекин 1980‏-йили әслигә кәлтүрүлгән. «Биңтуән гезити» ниң хәвиридә ашкарилинишичә, биңтуәнгә қарашлиқ 10 девизийә вә шәһәр, 25 бозйәр өзләштүрүш райони җ х қатнаш башқуруш ишлирини пүтүнләй өткүзүвелип, өз функсийәсини иҗра қилмақта икән.

Пикирләр (0)
Share
Толуқ бәт