Uyghur aptonom rayonining bir qisim hoquqi bingtu'en'ge ötküzüp bérilgen

Muxbirimiz erkin
2019-01-07
Élxet
Pikir
Share
Print

Uyghur aptonom rayonining amanliq ishlirigha alaqidar bezi memuri funksiyelik roli we qanun ijra qilish hoquqliri ötken yili xitayning "Shinjang ishlepchiqirish-qurulush bingtu'enni" ge tapshurup bérilgen.

Uyghur aptonom rayonining bu hoquqlarni öz ixtiyarliqi bilen yaki merkezning buyruqi bilen bingtu'en'ge tapshurup bergenliki melum emes. Bingtu'en axbarat wasitilirining ashkarilishiche, bu bingtu'en islahatini chongqurlashturush, bingtu'enni jenubqa qarap kéngeytish pilanining bir qismi iken. Bezi közetküchiler, bu hoquqlarning bingtu'en'ge ötküzüp bérilishi Uyghurlarning bixeterlikige téximu zor xewp élip kélidighanliqini bildürmekte. "Bingtu'en géziti" ning 7‏-yanwar xewiride ashkarilishiche, bingtu'en jama'et xewpsizlik organliri 2018‏-yili 2‏-aydin bashlap Uyghur aptonom rayonining chong yol qatnishi, amanliq we ot öchürüshni bashqurush qatarliq 140 xil memuriy funksiyesi we memuriy qanun ijra qilish, qatnash saqchisi we alahide saqchi teshkillesh qatarliq hoquqlirini tapshuruwalghan. Nöwette amanliq bashqurush, zeher cheklesh, ot öchürüsh, tor bixeterliki qatarliq 80 xil türni tapshuruwélish resmiyiti tamamlan'ghan.

Közetküchilerning ilgiri sürüshiche, Uyghur aptonom rayonining 140 xil memuriy funksiyesi we memuriy qanun ijra qilish hoquqining bingtu'en'ge bérilishi uning küchini téximu zor derijide azaytip, bingtu'enning küchini téximu zoraytidiken. Bingtu'enning burunqi resmiy shtati xitay merkizi hökümitining Uyghur aptonom rayonida turushluq ishlepchiqirish karxanisi idi. Lékin xitay hökümiti 2009‏-yili yüz bergen ürümchi "5‏-Iyul weqesi" din kéyin qanun chiqirip, uninggha bir derijilik memuriy shtat bergen. Da'iriler ötken yildin bashlap bingtu'enni jenubqa qarap kéngeytishni otturigha qoyghan idi.

"Bingtu'en géziti" ning xewiride bayan qilinishiche, bingtu'en j x organliri aptonom rayonning bir qisim hoquqlirini tapshuruwalghandin kéyin kadirlirini jenubqa yötkilishke righbetlendürüp, jenubtiki yerlikning "Aldinqi sep" ishlirigha aktip qol tiqishqa bashlighan.

"Ishlepchiqirish qurulush bingtu'eni" 1954 ‏-yili qurulghan bolup, 1974‏-yili yerlikning ishlirigha "Tosqun boldi" dégen seweb bilen tarqitiwétilgen bolsimu, lékin 1980‏-yili eslige keltürülgen. "Bingtu'en géziti" ning xewiride ashkarilinishiche, bingtu'en'ge qarashliq 10 déwiziye we sheher, 25 bozyer özleshtürüsh rayoni j x qatnash bashqurush ishlirini pütünley ötküzüwélip, öz funksiyesini ijra qilmaqta iken.

Toluq bet