Bingtu'en partkomi bingtu'en bilen yerlikning yughurulushini tézlitishni telep qilghan

Xitayning Uyghur élidiki “Shinjang ishlepchiqirish-qurulush bingtu'eni” yéqinda yighin chaqirip, xitayning mezkur yérim ishlepchiqirish, yérim qoralliq teshkilatining ijtima'iy muqimliq, uzun muddetlik eminlik we “Shinjangni medeniyet bilen uzuqlandurush” ta, rayonning ‍iqtisadi we téxnologiye tereqqiyatida téximu chong rol oynishi, yerlik bilen bingtu'enni qoshiwétishni tézlitishni telep qilghan.

“Bingtüen géziti” ning 27-yanwar xewer qilishiche, bu chaqiriq bingtu'en partkomining 12-yanwar chaqirilghan 8-nöwetlik-4 omumi yighinida otturigha qoyulghan. Lékin xewerde, bu yighinning rohi néme üchün emdi xewer qilin'ghanliqigha chüshenche bérilmigen.

“Bingtüen géziti” ning éytishiche, yighinda Uyghur aptonom rayonluq partkomning sékritari ma shingruyning telipi yetküzülüp, uning “Bu yilliq xizmetni asasi nuqtigha merkezleshtürüshni, bingtu'enning tereqqiyati partiye we döletning omumiy istiratégiyesige kapatlik qilishi, islahatni chongqurlashturup, bingtu'enning chégrani qoghdashtiki rolini ilgiri sürüsh, yerlik bilen bingtu'enning qoshuwétilishi we bingtu'enning yuqiri süpetlik tereqqiyati qatarliq nuqtiliq xizmetler” ni ishqa ashurushni telep qilghanliqi tekitlen'gen. Xitay hökümiti 2017-yili bashlan'ghan chong tutqun bilen bir waqitta, bingtu'enni jenubqa kéngeytish, bingtu'en bilen yerlikni qoshuwétishni otturigha qoyup, bingtu'enning rayondiki siyasiy, iqtisadiy, yer-zémin, bayliq, bixeterlik, nupus jehetlerdiki tesirini zor derijide ashurghan.

Bingtu'en bu jeryanda Uyghurlarni keng kölemde tutqun qilip, lagér, türmilerge qamashta aktip rol oynighan. Amérika hökümiti 2020-yili bingtu'enning Uyghurlarni basturushta oynighan roli seweblik imbargo yürgüzgen idi. Lékin bu qétimliq yighin, bingtu'enning “Partiyening yéngi dewrdiki shinjangni bashqurush istratégiyesi we bingtu'enning ornigha bolghan telipini toluq hem toghra ijra qilip, shinjang xizmitining asasi nishanigha merkezlishish” ni, yerlik bilen bingtu'en qoshulup tereqqiy qilishni chiqish nuqta qilip, “Shinjang xizmitining bash nishanigha yétishte téximu chong rol oynishi” ni telep qilghan.