Биңтуәнниң кәспий тәрбийәләш орунлири мәҗбурий әмгәкниң таянч базилириға айланмақта икән

Вашингтондин мухбиримиз җәвлан тәйярлиди
2024.02.21

Хитайниң “шинхуа тори” 21-феврал күни елан қилған бир хәвәрдә, 2023-йил биңтуән орунлирида “кәспий тәрбийәләш орунлири” да тәрбийәләнгәнләрниң 120 миң адәм қетимдин ешип кәткәнлики хәвәр қилинған. Буниң ичидә хитай һөкүмити толуқлима ярдәм бәргән кәспий тәрбийәләшкә қатнашқан адәм 100 миң қетимдин ашқан.

Санаәт вә мулазимәт кәспидә тәрбийәләнгәнләрниң нисбити 80 пирсәнткә йәткән. Буниңдин хитай даирилириниң биринчи кәсип болған йеза игиликтин нурғун адәм күчини иккинчи вә үчинчи кәсип болған санаәт вә мулазимәт кәспигә йөткигәнлики билинмәктә.

Хәвәрдә ейтилишичә, 2023-йилниң ахириғичә биңтуән кәсипий тәрбийәләш орунлири 81 гә йәткән болуп, кәспий салаһийәт гуваһнамисигә еришкәнләр 60 миң адәм қетимға йәткән.

Доктор адриян зениз бу йил 14-феврал күни елан қилған бир доклатта ейтилишичә, уйғур районида аталмиш “қайта тәрбийәләш мәркизи” яки “кәспий техника тәрбийәләш мәркизи” билән бағланған мәҗбурий әмгәк системиси билән “әмгәк күчлирини йөткәш арқилиқ намратлиқтин қутулдуруш” сияситигә бағланған мәҗбурий әмгәк системиси мәвҗут болуп, хитай даирилири йеза әмгәк күчлирини мәҗбурий йиғивелип тәрбийәләш арқилиқ уларни йеза игилик саһәсидин башқа саһәгә йөткәйдикән.

2023-Йили хитай даирилири уйғур диярида 2 милйон 500 миң адәм қетим “кәспий техника тәрбийәси” елип барған болуп, уйғурларни асас қилған йеза әмгәк күчини тәрбийиләш вә йөткәш нишани ашуруп орунланған икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.