Биңтуән бу йил 1 милйон 440 миң мо юқири мәһсулатлиқ терилғу йәр бәрпа қилишни пиланлиған

Мухбиримиз ирадә
2022-03-24
Share

Хитайниң уйғур елида турушлуқ ишләпчиқириш-қурулуш биңтуәни бу йил уйғур елида 1 милйон 440 миң мо юқири мәһсулатлиқ терилғу йәр бәрпа қилишни пиланлиған.

“биңтуән хәвәрлири” торида елан қилинған бу хәвәр чәт әлләрдики уйғур көзәткүчиләрниң күчлүк диққитини қозғиди. Көзәткүчиләр қисқиғина бир йил ичидә 1 милйон 440 миң мо йоқири мәһсулатлиқ терилғу йәр бәрпа қилишниң арқисида нурғун сиясий тактикиларниң мәвҗутлуқини, буниң уйғурларға аит болған вә алиқачан уйғурлар тәрипидин ечилип болған йәрләрниң биңтуәнгә өткүзүп берилишидин дерәк беридиғанлиқини билдүрүшмәктә.

Дәрвәқә, бу йил 1-айда хитай һөкүмити уйғур дияридики терилғу йәрләр, бағ-варанлар вә су байлиқлирини омумиййүзлүк ениқлаш һәрикити қозғиған иди. Әйни чағда хитай мәтбуатлирида уйғур дияридики терилғу йәрниң 106 милйон мо икәнлики, буниңда 28 милйон мо йәрниң йеңидин ечиш арқилиқ көпәйгәнлики ейтилған. “хитай хәвәрлири” тори йәнә шу қетимлиқ ениқлашта уйғур елида 15 милйон модин артуқ һәр хил мевилик бағниң барлиқини билдүргән.

Хитай һөкүмити 2019-йилиму “уйғур елидики йәрләрни рәтләш түри” бойичә ташлинип қалған йәрләрни түзәп, қайтидин һөддигә бериш һәрикити қозғиған иди. Әйни вақитта ичкири өлкиләрдин чақирип келингән миңларчә хитай көчмәнләрниң бикарлиқ терилғу йәр вә өй-җай билән тартуқланғанлиқи диққәт қозғиған иди.

Юқириқи биңтуән хәвиридә, биңтуәнниң һазирғичә җәмий 11 милйон 630 миң мо юқири мәһсулатлиқ терилғу йәр бәрпа қилип, яхши иҗтимаий үнүм вә иқтисадий үнүмгә еришкәнлики илгири сүрүлгән. Һалбуки, уйғур көзәткүчиләр хитайниң ғәйрий-рәсмий қораллиқ армийәси болған биңтуәнниң уйғур елигә йәрләшкәндин буян уйғурлар ачқан әң мунбәт терилғу йәр вә су мәнбәлирини тартивелип, талан-тараҗ қилип кәлгәнликини билдүрүшмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт