Bingtu'en bu yil 1 milyon 440 ming mo yuqiri mehsulatliq térilghu yer berpa qilishni pilanlighan

Muxbirimiz irade
2022.03.24
Share on WhatsApp
Share on WhatsApp

Xitayning Uyghur élida turushluq ishlepchiqirish-qurulush bingtu'eni bu yil Uyghur élida 1 milyon 440 ming mo yuqiri mehsulatliq térilghu yer berpa qilishni pilanlighan.

“Bingtu'en xewerliri” torida élan qilin'ghan bu xewer chet ellerdiki Uyghur közetküchilerning küchlük diqqitini qozghidi. Közetküchiler qisqighina bir yil ichide 1 milyon 440 ming mo yoqiri mehsulatliq térilghu yer berpa qilishning arqisida nurghun siyasiy taktikilarning mewjutluqini, buning Uyghurlargha a'it bolghan we aliqachan Uyghurlar teripidin échilip bolghan yerlerning bingtu'en'ge ötküzüp bérilishidin dérek béridighanliqini bildürüshmekte.

Derweqe, bu yil 1-ayda xitay hökümiti Uyghur diyaridiki térilghu yerler, bagh-waranlar we su bayliqlirini omumiyyüzlük éniqlash herikiti qozghighan idi. Eyni chaghda xitay metbu'atlirida Uyghur diyaridiki térilghu yerning 106 milyon mo ikenliki, buningda 28 milyon mo yerning yéngidin échish arqiliq köpeygenliki éytilghan. “Xitay xewerliri” tori yene shu qétimliq éniqlashta Uyghur élida 15 milyon modin artuq her xil méwilik baghning barliqini bildürgen.

Xitay hökümiti 2019-yilimu “Uyghur élidiki yerlerni retlesh türi” boyiche tashlinip qalghan yerlerni tüzep, qaytidin höddige bérish herikiti qozghighan idi. Eyni waqitta ichkiri ölkilerdin chaqirip kélin'gen minglarche xitay köchmenlerning bikarliq térilghu yer we öy-jay bilen tartuqlan'ghanliqi diqqet qozghighan idi.

Yuqiriqi bingtu'en xewiride, bingtu'enning hazirghiche jem'iy 11 milyon 630 ming mo yuqiri mehsulatliq térilghu yer berpa qilip, yaxshi ijtima'iy ünüm we iqtisadiy ünümge érishkenliki ilgiri sürülgen. Halbuki, Uyghur közetküchiler xitayning gheyriy-resmiy qoralliq armiyesi bolghan bingtu'enning Uyghur élige yerleshkendin buyan Uyghurlar achqan eng munbet térilghu yer we su menbelirini tartiwélip, talan-taraj qilip kelgenlikini bildürüshmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet