Bingtüen orunliri xitay köchmenlirini ishqa orunlashturush bashlamchisigha aylan'ghan

Washin'gtondin muxbirimiz jewlan teyyarlidi
2024.04.03

Herbiy tüzüm bilen memuriyet birleshken bingtüen orunliri uzun yillardin béri xitay köchmenlirining séghinidighan makani bolup kelgen bolsa, bügünki künde ularni yéngi xizmet orunliri bilen teminleydighan bashlamchi orun'gha aylan'ghan.

“Shinjang xewerliri” torining 3-aprél chiqarghan xewirige qarighanda, bu yilning birinchi peslide, Uyghur rayonining her qaysi jayliridiki bingtüen orunliri 358 meydan xizmetchi élish pa'aliyiti ötküzgen bolup, buni “Bahar shamili” herikiti dep atighan. Bu pa'aliyette bingtüen ishsizlargha we ish kütüp turuwatqanlargha 65 minggha yéqin ish orni teminligen. Ular yene adem élish da'irisini ichkiri xitayghimu qaratqan bolup, buning üchün mexsus tor béti qurup, “Intérnét bilen adem élish bir gewdileshken mulazimet supisi” berpa qilghan.

Uyghur rayonigha jelip qiliniwatqan xitay köchmenliri heqqide filim ishligen firansuz zhurnalistlardin manon bachlét xanim bu filim arqiliq bingtüenning tarixi we ichkiri xitaydin kélidighan köchmen nopusni ishqa orunlashturush we makanlashturushta oynighan hel qilghuchi rolini eks ettürgen. U radiyomizgha qilghan sözide, bularning asasen xitay kompartiyesi bash sékrétari shi jinpingning “Uyghurlarni ichkiri xitaygha bérish ishleshke, xitaylarni bolsa shinjanggha bérishqa righbetlendürüsh” chaqiriqi bilen boluwatqanliqini bildürgenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.