Bingtu'en bilen yerlik memuriy orunlarning birlishish qedimi tézlishiwatamdu?

Muxbirimiz jewlan
2021-05-26
Share

Xitay taratqulirining xewirige qarighanda, Uyghur aptonom rayonluq hökümet we bingtu'en dölet bayliqini nazaret qilish we bashqurush komitétliri yéqindin masliship, yéngi tereqqiyat yaritish üchün ortaq küresh qilmaqchi bolghan. 5-Ayning 21-küni bu ikki komitét "Istratégiyelik hemkarliq kélishimi" imzalighan. Ikki terep dölet bayliqi we dölet karxanilirigha munasiwetlik "14-Besh yilliq pilan" tüzüp, dölet iqtisadiy qurulmisini ilgharlashturush, kesip qurulmisi tengshesh jehettiki hemkarliqini kücheytmekchi, shu arqiliq bingtu'enning dölet bayliqi we dölet karxaniliri islahatini ilgiri sürmekchi bolghan.

Bingtu'en bilen yerlik memuriy orunlar bir-birining dawalinish sughurtisini étirap qilishqa bashlighan. Aqsu wilayitidiki her qaysi nahiye we sheherlerdiki dawalinish kapaliti idariliri bingtu'en 1-déwiziye doxturxanisi, aral sheherlik doxturxana we sekkiz tu'en-meydan doxturxaniliri bilen dawalash mulazimiti kélishimi imzalighan bolup, bingtu'en bilen yerliktiki ahalilerning dawalinish sughurtisi birleshtürüwétilgen. Wilayetlik dawalinish kapaliti idarisi özliri nuqta qilip békitken her qaysi dawalash orunlirining téléwizor ékrani we bashqa teshwiqat supilirida bingtu'en bilen yerliktiki ammini bir tutash dawalashqa a'it siyaset-belgilimler we dawalinish tertipini teshwiq qilghan.

Közetchilerning qarishiche, Uyghur rayonidiki bingtu'enning tesiri hazir mislisiz küchiyip ketken bolup, yuqiriqi ikki komitétning atalmish istratégiyelik hemkarliqida tilgha élin'ghan "Zamaniwi yéza igilik we toqumichiliq kespini tereqqiy qildurup, bingtu'en bilen yerlikte dangliq karxanilarni berpa qilish" pilanliri emeliyette yerlik hökümetning bingtu'en üchün xizmet qilish pilanidin ibaret. Bingtu'en bilen yerlikning dawalinish sughurtisining birleshtürülüshi bu ikki orunning her qaysi sahelerde bir gewdilishishke qarap mangghanliqini körsitidu. Bingtu'enning bu sür'ette tereqqiy qilishi kelgüside yerlik hökümetni qorchaq orun'gha aylandurup qoyushi, bayliqning hemmisi bingtu'en teripidin monopol qilinishi mumkin.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet