Xitay hökümiti "Bingtu'en" ge meblegh sélishni kücheytip, uning tesirini dawamliq kéngeytmekte

Muxbirimiz erkin
2019-06-24
Élxet
Pikir
Share
Print

Xitay hökümiti özining Uyghur diyaridiki yérim ishlepchiqirish, yérim qoralliq teshkilati ‏- "Bingtu'en" ge meblegh sélishni kücheytip, uning Uyghur aptonom rayonining iqtisadiy, ijtima'iy, siyasiy we bixeterlik hayatidiki rolini dawamliq kücheymekte. Xitay taratqulirining ashkarilishiche, xitay hökümiti bu yil bingtu'enning ma'arip, sehiye, ishqa orunlishish, ma'ash östürüsh qatarliq 88 xil qurulush türige 36 milyard 717 milyon yüen meblegh sélishni qarar qilghan. Bu, xitay merkizi hökümitining hazirgha qeder bingtu'enning ijtima'iy tereqqiyatigha salghan eng zor maliye sélinmilirining biridur. Közetküchilerning ilgiri sürüshiche, xitay hökümitining zor miqdarda meblegh ajritishi uning jenubtiki bir oblast, 3 wilayetke qarap kéngiyish pilani bilen munasiwetlik iken.

Közetküchiler, da'irilerning bingtu'en ezalirini Uyghurlar köp sanliqtiki bu rayonlargha téximu köp jelp qilish üchün bingtu'enning bu rayonlardiki ijtima'iy ul eslihelirige köplep meblegh salmaqtiken.

"Shinjang géziti" ning 24‏-iyun bergen xewiride, bu yil bingtu'enning xelq turmushigha ajritilghan meblegh 4.7 Pirsent ashqanliqi, bu basquchluq maliye jughlanmisining 4 hesse köpiyip, hökümet xaraktérlik qerzning xewpi azaytilghanliqi yaki aldi élin'ghanliqi tekitligen. Xitay hökümiti 2017‏-yili 2‏-aydin bashlap 2 milyondek Uyghur, qazaq we rayondiki bashqa musulman milletlirini tutqun qilip, lagérlargha qamash bilen bir waqitta "Ishlepchiqirish-qurul'ush bingtu'eni" ni jenubqa qarap kéngeytishni tézletken.

Uyghur aptonom rayonluq tereqqiyat we islahat komitétining doklatida qeyt qilinishiche, 2017-2018-yili bingtu'enning jenubtiki déwiziye we sheherlirining nopusigha az kem 100 ming adem qoshulghan. Shuningdek yene Uyghur aptonom rayonluq hökümet 2018‏-yili höjjet chüshürüp, bingtu'en'ge 2190 xil memuriy funksiye we memuriy qanun ijra qilish hoquqi bergen. Da'iriler yene aptonom rayon bilen bingtu'enning maliye bashqurush tüzülmisini ayrip, bingtu'enning baj ishlirini tewelikidiki rayonlarda öz aldigha bir terep qilishni yolgha qoyghanidi. Bu hadise, nurghun Uyghur közetküchilerde endishe peyda qilghan. Ular bu ehwal bingtu'enning tedrijiy Uyghur aptonom rayonini kontrol qiliwélishigha élip baridighanliqini agahlandurup keldi.

Toluq bet