Bingtu'en da'iriliri "Shinjang xizmitining bash nishanini emelge ashurush" qa mes'ul bolidiken

Muxbirimiz jewlan
2021-07-05
Share

Xitay taratqulirining xewirige qarighanda, Uyghur aptonom rayonluq partkomning mu'awin sékritari, bingtu'en partkomining sékritari wang jünjéng 2-iyul bingtu'enning kéngeytilgen yighinida söz qilip, bingtu'endiki her derijilik orunlar we partiye ezaliridin xitay kompartiyesining "Qizil géni" gha warisliq qilip, kommunizm étiqadini mustehkemlep, xitayning "Shinjangni tüzesh we tertipke sélish" siyasitini izchillashturushini, shinjang xizmitining bash nishanini emelge ashurushni bingtu'enning mes'uliyiti qilishni telep qilghan.

Xewerde éytilishiche, wang jünjéng bu qétimliq yighinda bingtu'endiki kona eskerlerning "Shinjangni qoghdash we güllendürüshtiki inqilawi rohi" gha warisliq qilish, "Térrorluqqa zerbe bérip muqimliqni qoghdashni qanunlashturush, tüzümleshtürüsh, da'imliq weziyetke aylandurush" wezipisini qet'iy ijra qilishni tekitligen.

Közetküchilerning qarishiche, wang jünjéngning bu telepliri xitay hökümitining bingtu'en orunliridin kütidighan telep we ümidlirini eks ettüridiken. Bingtu'enning yéqinda köp tekitlewatqan "Islahatni chongqurlashturush, islahat méwilirini qoghdash, herbiy tüzüm we bir tutash bashqurush ewzellikidin paydilinip shinjangning iqtisadini tereqqiy qildurushqa yétekchilik qilish" taktikiliri tamamen bu rayonni xitayning herbiy we iqtisadiy bazisigha aylandurush iken. Xitay hökümitining 1954-yili bingtu'enni qurush meqsitimu Uyghur rayonini xitayning menggülük mustemlikisige aylandurush üchün bolup, nechche on yildin buyan "Shinjangda muqimliq ornitish" bash nishan qilin'ghanliqi üchün, bingtu'enning orni alahide yuqiri kötürülgen we tereqqiy qildurulghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet