Bingtu'enning roli téximu kücheytilidighanliqi melum bolmaqta

Muxbirimiz eziz
2017.07.11

“Ürümchi kechlik géziti” de 10-iyul küni “Shinjang ishlepchiqirish we qurulush bingtu'eni” ning partiye sékrétari sun jinlüngning maqalisi élan qilin'ghan bolup, u maqalide bundin kéyin bingtu'enning rolini téximu kücheytish heqqide tepsiliy toxtalghan.

Maqalide “Shinjangning partiye we hökümetning istratégiyilik orunlashturmisidiki pewqul'adde ornini aydinglashturuwélish lazim” dégen nuqta alahide gewdilendürülgen bolup, alaqidar mutexessisler buning xitay hazir jiddiy yolgha qoyuwatqan “Bir belwagh, bir yol qurulushi” bilen zich munasiwetlik ikenlikini algha sürmekte.

Uyghurlar diyari izchil halda xitaydiki eng “Muqimsiz” rayon dep qarilidu. Analizchilar maqalidiki“Bingtu'en xizmitini kücheytishke boliduki, ajizlitishqa bolmaydu. Chünki bingtu'en partiye merkiziy komitétining shinjang xizmiti heqqidiki bash nishanini ishqa ashurushidiki eng muhim istratégiyilik küch” dégen bayanlar, xitay merkiziy hökümiti Uyghurlar diyarida yolgha qoyuwatqan “Muqimliq” namidiki siyasiy tedbirlerni emeliyleshtürüshte bingtu'enning awan'gartliq rol oynaydighanliqidin bésharet béridu, dep qarimaqta.

Melum bolushiche, xitayning “Bingtu'en” namidiki bu xil yérim herbiy xaraktérdiki teshkiliy qurulmisi peqet Uyghurlar diyaridila mewjut bolup, xitay merkiziy hökümiti izchil halda “Bingtu'en -shinjangning muqimliqini saqlashtiki eng ishenchlik küch” dep qarap kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.