Хитай рәиси ши җинпиң биңтуәнниң “җиддий вәзийәт” кә һәр даим тәйяр турушини буйруған

Мухбиримиз җәвлан
2022.08.01
Share on WhatsApp
Share on WhatsApp

“биңтуән гезити” ниң 1-авғуст чиқарған хәвиригә қариғанда, биңтуән 8-девизийә шихәнзә шәһәрлик қораллиқ қисим “биңтуән җиддий вәзийәткә тақабил туриду” дегән бәлгә чапланған тик учар айропиланлар билән вәзипә өтәшкә тәйярланған.

Гәрчә бу хәвәрдә мәзкур айропиланлар “апәттин қутқузуш, маддий әшя тошуш қатарлиқларға ишлитилиду” дейилгән болсиму, униң һәрбий ишларға вә аталмиш “террорчиларни бастуруш” ишлириға қоллинилидиғанлиқи тәхмин қилинмақта. Чүнки хитай рәиси ши җинпиң 7-айниң оттурисида шихәнзигә берип, биңтуән қораллиқ күчлирини көздин кәчүргәндә, “авангарт қошун” қуруш тәлипини оттуриға қойған.

Ши җинпиң биңтуәндики кадир вә әскәрләргә қилған сөзидә, “йеңи дәврдики биңтуән муқимлиқни сақлап, чегра районни қоғдаштики йеңи әвзәлликини тиришип бәрпа қилиши керәк” дегән. Буниңға асасән биңтуән “илғар хәлқ әскәрлири” қошуни бәрпа қилиш үчүн биңтуән, девизийә шәһәрлири, туән-мәйданларда “хәлқ әскәрлири” хизмәт комитети вә ишханиси қурушни, һәр қайси девизийә шәһәрлири парткоминиң баш секритарини мәзкур шәһәр қораллиқ қисимниң баш секретари қилишни қарар қилған. Бу қошунниң вәзиписи “адәттики вақитта вәзипә иҗра қилиш, җиддий әһвалда дәрһал атлиниш, җәң болуп қалса җәңгә кириш” дәп бекитилгән.

Униңдин башқа, бу йилниң алдинқи йеримида биңтуән орунлириниң алий мәктәпни пүттүргән 4318 оқуғучини ишқа орунлаштурғанлиқи хәвәр қилинған болуп, буларниң мутләқ көп қисминиң шихәнзә университети қатарлиқ мәктәпләрни пүттүргән хитай оқуғучилири икәнлики мәлум. Биңтуәнниң характери бойичә болғанда, улар кәспий, мәмурий ишларни қилидиғанларла әмәс, өз нөвитидә “хәлқ әскәрлири” ролини ойнайдиған күчләр һесаблинидикән.

Америкадики сиясий анализчи андерс кор илгири радийомизға бәргән зияритидә, биңтуәнниң һәрбий күчини кеңәйтиштики мәқсити һәққидә тохтилип “улар биңтуәндин пайдилинип уйғур районидики иқтисадий талан-тараҗ вә һәрбий зораванлиқни йәнә бир қәдәм кеңәйтмәкчи, шундақла уйғур қатарлиқ милләтләргә давамлиқ ирқий қирғинчилиқ йүргүзмәкчи” дегәниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.