Xitay re'isi shi jinping bingtu'enning “Jiddiy weziyet” ke her da'im teyyar turushini buyrughan

Muxbirimiz jewlan
2022.08.01
Share on WhatsApp
Share on WhatsApp

“Bingtu'en géziti” ning 1-awghust chiqarghan xewirige qarighanda, bingtu'en 8-déwiziye shixenze sheherlik qoralliq qisim “Bingtu'en jiddiy weziyetke taqabil turidu” dégen belge chaplan'ghan tik uchar ayropilanlar bilen wezipe öteshke teyyarlan'ghan.

Gerche bu xewerde mezkur ayropilanlar “Apettin qutquzush, maddiy eshya toshush qatarliqlargha ishlitilidu” déyilgen bolsimu, uning herbiy ishlargha we atalmish “Térrorchilarni basturush” ishlirigha qollinilidighanliqi texmin qilinmaqta. Chünki xitay re'isi shi jinping 7-ayning otturisida shixenzige bérip, bingtu'en qoralliq küchlirini közdin kechürgende, “Awan'gart qoshun” qurush telipini otturigha qoyghan.

Shi jinping bingtu'endiki kadir we eskerlerge qilghan sözide, “Yéngi dewrdiki bingtu'en muqimliqni saqlap, chégra rayonni qoghdashtiki yéngi ewzellikini tiriship berpa qilishi kérek” dégen. Buninggha asasen bingtu'en “Ilghar xelq eskerliri” qoshuni berpa qilish üchün bingtu'en, déwiziye sheherliri, tu'en-meydanlarda “Xelq eskerliri” xizmet komitéti we ishxanisi qurushni, her qaysi déwiziye sheherliri partkomining bash sékritarini mezkur sheher qoralliq qisimning bash sékrétari qilishni qarar qilghan. Bu qoshunning wezipisi “Adettiki waqitta wezipe ijra qilish, jiddiy ehwalda derhal atlinish, jeng bolup qalsa jengge kirish” dep békitilgen.

Uningdin bashqa, bu yilning aldinqi yérimida bingtu'en orunlirining aliy mektepni püttürgen 4318 oqughuchini ishqa orunlashturghanliqi xewer qilin'ghan bolup, bularning mutleq köp qismining shixenze uniwérsitéti qatarliq mekteplerni püttürgen xitay oqughuchiliri ikenliki melum. Bingtu'enning xaraktéri boyiche bolghanda, ular kespiy, memuriy ishlarni qilidighanlarla emes, öz nöwitide “Xelq eskerliri” rolini oynaydighan küchler hésablinidiken.

Amérikadiki siyasiy analizchi andérs kor ilgiri radiyomizgha bergen ziyaritide, bingtu'enning herbiy küchini kéngeytishtiki meqsiti heqqide toxtilip “Ular bingtu'endin paydilinip Uyghur rayonidiki iqtisadiy talan-taraj we herbiy zorawanliqni yene bir qedem kéngeytmekchi, shundaqla Uyghur qatarliq milletlerge dawamliq irqiy qirghinchiliq yürgüzmekchi” dégenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.