Xitay hökümiti Uyghur diyarigha "Bingtu'en rohi" ni omumlashturmaqchi

Muxbirimiz eziz
2021-08-24
Share

Xitay hökümitining bingtu'en sistémisini zoraytish qurulushini zor küch bilen qollawatqanliqi ötken birnechche yildin buyan köplep melum bolghan idi. Emdilikte ‍ular bingtu'en sistémisini öz ‍ichige alghan "Bingtu'en rohi" ni Uyghur diyarigha kéngeytishni ashkara chaqiriq qilishqa bashlighan.

Xitay merkiziy téléwéziye istansisining 24-awghusttiki xewiride éytilishiche, 1954-yilidin bashlap mewjut bolushqa bashlighan bingtu'en sistémisi "Chégra rayonlarda yiltiz tartip, chégra rayonni güllendürüsh" tek özgiche "Roh" ni jewlan qildurghan. Shu sewebtin nöwette bu xil rohni téximu keng da'irige omumlashturush zörür iken.

Xewerde éniq qilip bingtu'en sistémisining xitay döliti üchün "Chégra rayonni idare qilishtiki muhim waste bolghanliqi" iptixarliq ichide medhiyilen'gen. Shuningdek bingtu'enlerning xitaydin yüz minglap köchüp chiqqan xitay aqqunlirini makanlashturush we bu rayondin kételmes qilip qoyush üchün berpa qilip chiqqan toqumichiliq zawutliri, qeghez zawutliri qatarliqlarni "Chégra rayonni güllendürüshning misali" dep chüshendürgen.

Dunya ‍uyghur qurultiyining bayanatchisi dilshat rishit radiyomizning bingtu'en heqqidiki ziyaritini qobul qilghanda "Sherqiy türkistandiki bingtu'enler emeliyette xitay hökümitining Uyghurlarni téximu qattiq iskenjige élishidiki bir muhim waste. Shu sewebtin xitayning héchqandaq yéride bingtu'en qalmidi. Emma sherqiy türkistanda u téximu kéngiyiwatidu," dégen idi. Nöwette xitay hökümitining bu xildiki "Bingtu'en rohi" arqiliq Uyghur diyarigha yéngidin köchüp kelgen xitay aqqunlirini mushu makan'gha menggülük olturaqlashturushni közlewatqanliqi heqqide texminler otturigha chiqmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet