Xitayning Uyghur rayonidiki bingtu'en'ge qarashliq 3 shehiri xitaydiki "Eng küchlük sheher" bolup bahalan'ghan

Muxbirimiz erkin
2019-10-30
Élxet
Pikir
Share
Print

Xitayning Uyghur rayonidiki yérim ishlepchiqirish qoralliq orgini bolghan "Shinjang ishlepchiqirish qurulush bingtu'eni" ge qarashliq 3 sheher xitayning gherbiy shimalidiki 100 küchlük sheher bolup bahalan'ghan.

Közetküchilerning ilgiri sürüshiche, bu, xitay hökümitining 2009‏-yildin kéyin bingtu'enni zor derijide tereqqiy qildurup, uni Uyghur aptonom rayonining ichidiki uninggha riqabetchi küchlük gewdige aylanduruwatqanliqini körsitidiken.

Xitay xelq qurultiyi 2012‏-yili qanun maqullap, bingtu'en'ge aptonom rayon bilen teng derijilik memuriy shtat bergen. Bu, Uyghurlar izchil özlirige tehdit hés qilip kéliwatqan bu organning küchining téximu zoriyishigha yol achqanidi. "Bingtu'en géziti" ning 29‏-öktebir xewer qilishiche, "Xitay uchur jem'iyiti" bilen "Xitay riqabet küchi eqil ambiri" yéqinda "2019‏-Yilliq xitayning gherbiy shimalidiki nahiye-sheherlerning tereqqiyatini ölchesh doklati" élan qilip, bingtu'en'ge qarashliq shixenze, aral we wujyachu qatarliq 3 sheherni xitayning gherbiy shimalidiki eng küchlük sheher, dep bahalighan. Uningda, bu sheherlerning iqtisadi kölimi, xelq turmushi, iqtisadning hayati küchi we iqtisadiy sapasi qatarliq 4 amil, we uninggha alaqidar 25 xil körsetküch asas qilin'ghan.

Közetküchilerning ilgiri sürüshiche, xitay hökümitining 2017‏-yili 4‏-ayda bashlighan tutqunida 2 milyondek Uyghur, qazaq we bashqa musulmanlarning lagérlargha qamilip, Uyghur jem'iyitining omumyüzlük qamal astigha élishi bingtu'enning küchining téximu zoriyishigha türtke bolmaqta iken. Xitay taratqulirining xewerliride, bu qétimqi bahalashta yene qeshqer, aqsu, korla, fukang, kuchar, ghulja qatarliq yerlikke qarashliq sheher ‏-nahiyelerningmu gherbiy shimaldiki 100 küchlük sheher qatarigha kirgenliki ilgiri sürülgen.

Toluq bet