Bingtu'en bu yilning aldinqi üch peslide 70 mingdin artuq ish orni tesis qilip, köchmen xitaylarni ishqa orunlashturghan

Muxbirimiz irade
2021-11-10
Share

Xitayning Uyghur élida turushluq ishlepchiqirish-qurulush bingtu'eni bu yilning aldinqi 3 peslidila 72 minggha yéqin ademni "Ishqa orunlashturghan" liqini ilgiri sürgen.

"Bingtu'en géziti" ning 10-noyabirdiki xewirige qarighanda, bingtu'en da'iriliri bu yil "Ishqa orunlashturush we xizmetni muqimlashturush" pilanini jiddiy ijra qilip, bingtu'en'ge qarashliq herqaysi diwiziye we sheher-bazarlarda bu yilning aldinqi üch peslide jem'iy 71 ming 500 yéngi xizmet orni tessis qilghan.

Yéqinqi birqanche yildin buyan "Shinjang ishlepchiqirish-qurulush bingtu'eni" xitayning ichkiy ölkiliridin zor türkümde xitay köchmenliri bilen aliy mektep püttürgen xitay oqughuchilarni yötkep chiqqan bolup, közetküchiler bu yilning aldinqi üch peslide bingtu'en'ge "Ishqa o'urunlashturulghan" 70 mingdin artuq kishining hemmisining dégüdek xitay ölkiliridin yötkep chiqqan xitaylar bolushi mumkinlikini texmin qilmaqta.

Xitay da'iriliri 1-noyabirdin bashlap xitayning chingxey, gensu, yünnen ölkiliri bilen tibet we ichki mongghol aptonom rayoni ahalilirining Uyghur éligha nupus yötkishini téximu qolaylashturghan we shundaqla yuqiriqi bu 5 ölke-aptonom rayonning nupus bashqurush sistémisini Uyghur aptonom rayoni we bingtu'en bilen tutashturghan idi.

"Bingtu'en géziti" ning xewiride yene bingtu'en da'irilirining bingtu'endiki "Karxanilargha yardem bérish we xizmetni muqimlashturush" siyasiti boyiche bingtu'enning zawutlirini yardem meblighi bilen teminligenliki, bingtu'en maliyesining ishqa orunlishish toluqlimisidin 639 milyon yüen ajritip, karxanilargha yardem bergenliki bayan qilin'ghan.

Amérika hökümiti xitayning Uyghur élida turushluq ishlepchiqirish-qurulush bingtu'eni we uninggha qarashliq birqanche organlarni Uyghurlarning mejburiy emgikige chétishliq dep qara tizimlikke alghandin buyan, bingtu'enning iqtisadida zor dawalghush bolghanliqi melum. Yéqinda "Jenubiy xitay etigenlik géziti" élan qilghan bir xewiride, ötken yili bingtu'enning kontrolluqidiki dölet karxaniliri kirimining jiddiy töwenlep ketkenlikini, ularning qerz patqiqigha pétip Uyghur aptonom rayoni üchünmu zor iqtisadiy bésim shekillendürüwatqanliqini xewer qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet