Биңтуән сиясий-қанун комитетиниң сабиқ секритари яң фулин “тәкшүрүлүш” кә елинған

Мухбиримиз ирадә
2021-12-02
Share

12-Айниң 2-күни хитай һөкүмәт таратқулири мәхсус хәвәр берип, “шинҗаң ишләпчиқириш-қурулуш биңтуәни” парткоминиң даимий әзаси, биңтуәнниң сабиқ муавин қомандани, биңтуән сиясий-қанун комитетиниң сабиқ секритари яң фулин “интизамға вә қанунға еғир дәриҗидә хилаплиқ қилғанлиқи” сәвәбидин “партийәдин қоғлап чиқирилғанлиқи” вә “дело турғузулуп тәкшүрүливатқанлиқи” ни билдүргән.

Хитай компартийәси мәркизи комитетиниң тәстиқи билән хитай компартийәси мәркизий интизам тәкшүрүш комитети билән дөләт назарәтчилик комитетиниң яң фулин һәққидә чиқарған қарарида мунулар дейилгән: “яң фулин бурч вә хизмәт мәсулийитидин ваз кечип, ғайисини вә етиқадини йоқатқан, тәшкилатниң тәкшүрүшигә қарши турған; мәркәзниң ‛сәккиз түрлүк бәлгилимә‚ синиң роһиға писәнт қилмиған, совғат қобул қилған вә бәлгилимигә хилаплиқ һалда кәйпи-сапа сүргән; биңтуәнниң сиясий муһитини бузған, һоқуқидин пайдиллинип қурулуш түрлири һөддигәрлики, әмәлдарларни өстүрүш, дело маслаштуруш қатарлиқ җәһәтләрдә башқиларға нәп йәткүзүш арқилиқ қанунсиз һалда ғайәт зор мал-мүлүк топлиған.”

Хәвәрдә дейилишичә, “партийәниң сиясий интизами, тәшкилий интизами, сәмимийәт интизами, хизмәт интизами вә турмуш интизамиға еғир хилаплиқ қилиш” билән әйибләнгән яң фулин, хитай компартийийәсидин қоғлап чиқирилған вә тәптиш органлириниң бир тәрәп қилишиға тапшуруп берилгән.

Алдинқи йили америка һөкүмити “биңтуәнниң уйғурларға қаритиливатқан зулум вә мәҗбурий әмгәктә роли бар” дәп қарап, шинҗаң ишләпчиқириш-қурулуш биңтуәни вә униң биринчи қол рәһбиригә, шундақла биңтуәнгә қарашлиқ бәзи чоң ширкәтләргә җаза тәдбири елан қилған иди. Шуниңдин кейин биңтуәнниң сиясий вә иқтисадий вәзийтидә бәзибир җидддий давалғушларниң йүз бериватқанлиқи хәвәр қилинған иди.

Мәлум болушичә, яң фулин узун мәзгил биңтуәнниң сиясий-қанун саһәсини контрол қилип кәлгән йоқири дәриҗилик әмәлдардур. 2017-Йилидин буян хитайниң биңтуәнни өз ичигә алған уйғур районида елип барған зор тутқунида милйонлиған кишиләрниң лагерларға, түрмиләргә вә мәҗбурий әмгәк орунлириға тутулғанлиқи мәлум. Көзәткүчиләр, ши җинпиң биваситә йолйоруқ бәргән бу зор тутқунни иҗра қилишта худди уйғур аптоном районлуқ сиясий-қанун комитетиниң сабиқ секритари җу хәйлунға охшашла, биңтуән сиясий-қанун комитетиниң биринчи қол рәһбири болған яң фулинниңму баш тартип болалмайдиған “қара қоли” барлиқини илгири сүрмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт