Bingtu'en siyasiy-qanun komitétining sabiq sékritari yang fulin “Tekshürülüsh” ke élin'ghan

Muxbirimiz irade
2021-12-02
Share

12-Ayning 2-küni xitay hökümet taratquliri mexsus xewer bérip, “Shinjang ishlepchiqirish-qurulush bingtu'eni” partkomining da'imiy ezasi, bingtu'enning sabiq mu'awin qomandani, bingtu'en siyasiy-qanun komitétining sabiq sékritari yang fulin “Intizamgha we qanun'gha éghir derijide xilapliq qilghanliqi” sewebidin “Partiyedin qoghlap chiqirilghanliqi” we “Délo turghuzulup tekshürüliwatqanliqi” ni bildürgen.

Xitay kompartiyesi merkizi komitétining testiqi bilen xitay kompartiyesi merkiziy intizam tekshürüsh komitéti bilen dölet nazaretchilik komitétining yang fulin heqqide chiqarghan qararida munular déyilgen: “Yang fulin burch we xizmet mes'uliyitidin waz kéchip, ghayisini we étiqadini yoqatqan, teshkilatning tekshürüshige qarshi turghan؛ merkezning ‛sekkiz türlük belgilime‚ sining rohigha pisent qilmighan, sowghat qobul qilghan we belgilimige xilapliq halda keypi-sapa sürgen؛ bingtu'enning siyasiy muhitini buzghan, hoquqidin paydillinip qurulush türliri höddigerliki, emeldarlarni östürüsh, délo maslashturush qatarliq jehetlerde bashqilargha nep yetküzüsh arqiliq qanunsiz halda ghayet zor mal-mülük toplighan.”

Xewerde déyilishiche, “Partiyening siyasiy intizami, teshkiliy intizami, semimiyet intizami, xizmet intizami we turmush intizamigha éghir xilapliq qilish” bilen eyiblen'gen yang fulin, xitay kompartiyiyesidin qoghlap chiqirilghan we teptish organlirining bir terep qilishigha tapshurup bérilgen.

Aldinqi yili amérika hökümiti “Bingtu'enning Uyghurlargha qaritiliwatqan zulum we mejburiy emgekte roli bar” dep qarap, shinjang ishlepchiqirish-qurulush bingtu'eni we uning birinchi qol rehbirige, shundaqla bingtu'en'ge qarashliq bezi chong shirketlerge jaza tedbiri élan qilghan idi. Shuningdin kéyin bingtu'enning siyasiy we iqtisadiy weziytide bezibir jidddiy dawalghushlarning yüz bériwatqanliqi xewer qilin'ghan idi.

Melum bolushiche, yang fulin uzun mezgil bingtu'enning siyasiy-qanun sahesini kontrol qilip kelgen yoqiri derijilik emeldardur. 2017-Yilidin buyan xitayning bingtu'enni öz ichige alghan Uyghur rayonida élip barghan zor tutqunida milyonlighan kishilerning lagérlargha, türmilerge we mejburiy emgek orunlirigha tutulghanliqi melum. Közetküchiler, shi jinping biwasite yolyoruq bergen bu zor tutqunni ijra qilishta xuddi Uyghur aptonom rayonluq siyasiy-qanun komitétining sabiq sékritari ju xeylun'gha oxshashla, bingtu'en siyasiy-qanun komitétining birinchi qol rehbiri bolghan yang fulinningmu bash tartip bolalmaydighan “Qara qoli” barliqini ilgiri sürmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet