Уйғур районидики биңтуәнгә қарашлиқ деивизийә-шәһәрләрниң биринчи қол әмәлдарлири алмаштурулған

Мухбиримиз әзиз
2021.12.20

Йеқинда уйғур районидики биңтуәнниң бир нәччә девизийә-шәһәрлириниң биринчи қол әмәлдарлириниң бирақла алмаштурулуши, һәр саһәниң диққитини қозғимақта.

Хитай һөкүмити башқуришидики “биңтуән хәвәрлири” ниң 20-декабирдики хәвиридә ейтилишичә, биңтуәнгә қарашлиқ 1-девизийә җайлашқан арал шәһири, 5-девизийәси җайлашқан шуаңхе (қош дәря) шәһири, 7-девизийә җайлашқан хуяңхе (тоғрақ дәря) шәһири, 8-девизийә җайлашқан шихәнзә шәһири вә 12-девизийәси қатарлиқларниң биринчи қол әмәлдарлири бирақла алмаштурулған. Шуниң билән бир вақитта йәнә биңтуәнниң йоқриқи дивизийә-шәһәрлириниң бир қисим муавин әмәлдарлири, сот мәһкимисиниң сотчилири вә хәлқ қурултийиниң рәһбәрлири қайтидин тәңшәлгән. Әмма биңтуәндики бу қетимлиқ зор көләмлик әмәлдар тәңшәштә бирәрму уйғур кадирниң болмаслиқи, һәтта уйғурлар нопуси мәлум нисбәтни тәшкил қилидиған биңтуән 1-дивизийәси вә арал шәһириниң әмәлдарлири арисида бирәрму уйғур әмәлдарниң болмаслиқи, диққәт қозғиған.

Мәлум болушичә, биңтуән системиси уйғур дияридики лагер системиси вә мәҗбурий әмгәкниң баш иҗра қилғучиси болуп, дәл мушу сәвәбтин америка һөкүмити биңтуәнгә һәмдә униң асаслиқ рәһбәрлиригә җаза елан қилған иди. Лагершунас алимлардин адрян зензниң тәтқиқатлири болса биңтуәнниң кәлгүси 20 йилда хитай һөкүмитиниң уйғур дияридики нопус қурулмисини өзгәртишидә көврүклүк рол ‍ойнайдиғанлиқини, шу сәвәбтин хитай мәркизий һөкүмитиниң һәр йили биңтуәнгә ғайәт зор мәбләғ аҗритидиғанлиқини пакитлиқ баян қилип бәргән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.