Биңтуәнниң 2022-йиллиқ хизмәт орунлаштурушида җәнубқа кеңийиш вә қораллиқ күчлирини күчәйтиш нишан қилинған

Мухбиримиз әркин
2021-12-21
Share

Хитай даирилири өткән һәптә ‍үрүмчидә йиғин өткүзүп, хитайниң райондики йерим қораллиқ йерим ишләпчиқириш тәшкилати болған “шинҗаң ишләпчиқириш-қурулуш биңтуәни” ниң 2022-йиллиқ хизмәтлирини орунлаштурған. Хитай таратқулириниң ейтишичә, биңтуәнни давамлиқ җәнубқа кеңәйиш, униң қораллиқ күчи болған “хәлқ әскәрлири” ни күчәйтиш вә биңтуәнни йәрлик билән биргәвдиләштүрүш униң келәр йиллиқ хизмәтлириниң муһим нишани икән.

Мәлум болушичә, бу орунлаштуруш биңтуән парткоминиң 17-вә 18-декабир күнлири чақирилған 7-нөвәтлик 13-омумий йиғинида оттуриға қоюлған. Уйғур аптоном районлуқ парткомниң секритари, қошумчә биңтуән парткоминиң биринчи секритари вә сиясий комиссари болған чен чуәнго сөз қилған бу йиғинда, биңтуәнниң сиясий комиссари ли йифей билән биңтуәнниң қомандани пең җяруй биңтүәнниң келәр йиллиқ хизмәтләрни орунлаштурған.

Биңтүән парткоминиң бу нөвәтлик йиғини америка һөкүмити әркин туниязни өз ичигә алған 4 нәпәр хитай әмәлдариға имбарго қойған, дөләт мәҗлиси “уйғур мәҗбури әмгикиниң алдини елиш қанун лайиһәси” үни мақуллап, президентниң имза қоюшиға сунған бир вақитта өткүзүлгән. “биңтуән хәвәрлири” ториниң ашкарлишичә, йиғин “муқимлиқ вә чеграни қоғдашқа әһмийәт берип, чегра район мудапийә иқтидарини муқимлаштуруш, юқири сәвийәлик бихәтәр биңтуән қуруп, алий сүпәтлик хәлқ әскәрләр қошуни бәрпа қилиш” ни тәләп қилған.

Йиғинда йәнә биңтуәнниң “җәнубқа қарап тәрәққий қилишини тезлитиш, базарни зорайтиш, биңтуән билән йәрликниң бир гәвдилишиш тәрәққиятини чоңқурлаштуруш, биңтуән билән йәрликни бир гәвдиләштүрүшниң түзүлмә механизимини мукәммәлләштүрүп, униң бир гәвдилишишини илгири сүрүш” тәләп қилинған.

Көзәткүчиләрниң ейтишичә, хитай биңтуәнни йәрлик билән бирләштүрүш арқилиқ, уйғур аптоном районини шәкилдә мәвҗут, әмәлийәттә биңтуәнниң контроллуқидики бир районға айландуруп қоюшни пиланлимақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт