Биңтүән "ғәрбий район пилани"намида йәнә бир түркүм хитай стодентларни уйғур елида хизмәткә орунлаштурди

Мухбиримиз меһрибан
2015-07-28
Share


Хитай хәвәрлиридин мәлум болушичә, даириләр бу йил хитай өлкилиридин университет түгәткән йәнә бир түркүм оқуғучиларни "ғәрбий район пилани" намида уйғур елиниң биңтүән игидарчилиқидики шәһәрлиригә орунлаштурған.

Хитай хәвәрләр ториниң 28 - июлдики хәвиридә дейилишичә, 27 - июл күни хенән, шәндуң, лявниң қатарлиқ 30 өлкә, шәһәрләрдин кәлгән йәнә бир түркүм алий мәктәп вә магистерлиқни түгәткән хитай оқуғучилар биңтүәнниң 14 девизийисидики йеңи иш орунлириға йетип келип, 1 йилдин 3 йилғичә тәқсим қилинған җайда ишләйдиғанлиқи һәққидә қәсәмят йиғиниға қатнашқан. Хәвәрдә дейилишичә, 2003 - йили биңтүән қатарлиқ җайларда "ғәрбий район пилани" йолға қоюлғандин буян җәми 6458 нәпәр алий мәктәп түгәткән оқуғучилар хитай өлкилиридин келип, биңтүәнниң дивизийилиридики мәктәп, дохтурхана, банка, қанун органлирида 1 йилдин 3 йилғичә йөткәлмәй ишләш тохтами имзалиған. Нөвәттә тохтам муддитини түгәткәнләрниң йерими биңтүәндики вә йәрликтики хизмәт орунлирида давамлиқ ишләш үчүн қелип қалған.

Йеқинқи йилларда хитай даирилири "ғәрбий районға ярдәм" намида хитай өлкилиридин түркүмләп хитай көчмәнлирини уйғур елидики иш орунлириға орунлаштурмақта. Һалбуки, 2000 - йилидин буян уйғур елиниң үрүмчи, қаримай қатарлиқ шәһәрлиридә ишсизлиқ мәсилиси барғанчә еғирлишип, алий мәктәпләрни түгитип, йиллардин буян иш күтүп туруватқан нәччә онмиңлиған уйғур қатарлиқ йәрлик милләт яшлириниң техичә ишқа орунлашмаслиқи, райондики уйғурларниң наразилиқини қозғап, хәлқараниң хитайниң миллий сияситидики баравәрсизликни әйибләштә нәқил алидиған муһим мәсилисигә айланди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт