Bingtüen "Gherbiy rayon pilani"namida yene bir türküm xitay stodéntlarni Uyghur élida xizmetke orunlashturdi

Muxbirimiz méhriban
2015-07-28
Share


Xitay xewerliridin melum bolushiche, da'iriler bu yil xitay ölkiliridin uniwérsitét tügetken yene bir türküm oqughuchilarni "Gherbiy rayon pilani" namida Uyghur élining bingtüen igidarchiliqidiki sheherlirige orunlashturghan.

Xitay xewerler torining 28 - iyuldiki xewiride déyilishiche, 27 - iyul küni xénen, shendung, lyawning qatarliq 30 ölke, sheherlerdin kelgen yene bir türküm aliy mektep we magistérliqni tügetken xitay oqughuchilar bingtüenning 14 déwiziyisidiki yéngi ish orunlirigha yétip kélip, 1 yildin 3 yilghiche teqsim qilin'ghan jayda ishleydighanliqi heqqide qesemyat yighinigha qatnashqan. Xewerde déyilishiche, 2003 - yili bingtüen qatarliq jaylarda "Gherbiy rayon pilani" yolgha qoyulghandin buyan jemi 6458 neper aliy mektep tügetken oqughuchilar xitay ölkiliridin kélip, bingtüenning diwiziyiliridiki mektep, doxturxana, banka, qanun organlirida 1 yildin 3 yilghiche yötkelmey ishlesh toxtami imzalighan. Nöwette toxtam mudditini tügetkenlerning yérimi bingtüendiki we yerliktiki xizmet orunlirida dawamliq ishlesh üchün qélip qalghan.

Yéqinqi yillarda xitay da'iriliri "Gherbiy rayon'gha yardem" namida xitay ölkiliridin türkümlep xitay köchmenlirini Uyghur élidiki ish orunlirigha orunlashturmaqta. Halbuki, 2000 - yilidin buyan Uyghur élining ürümchi, qarimay qatarliq sheherliride ishsizliq mesilisi barghanche éghirliship, aliy mekteplerni tügitip, yillardin buyan ish kütüp turuwatqan nechche onminglighan Uyghur qatarliq yerlik millet yashlirining téxiche ishqa orunlashmasliqi, rayondiki Uyghurlarning naraziliqini qozghap, xelq'araning xitayning milliy siyasitidiki barawersizlikni eyibleshte neqil alidighan muhim mesilisige aylandi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet