Bingtu'enning dawamliq ichkiridin memuriy xadim qobul qilishi diqqet qozghidi

Muxbirimiz eziz
2018-04-10
Élxet
Pikir
Share
Print

Xitay dahiyliridin déng shyawping 1980-yillarda "Shinjangdiki muqimliqning yadrosi" dep teripligen ishlepchiqirish-qurulush bingtu'eni mushu ayning béshida mexsus élan chiqirip, ichkiridiki ölkilerdin 2364 neper memuriy xadim qobul qilidighanliqini jakarlighan.

Bingtu'en toridiki uchurlarda körsitilishiche, bu qétim 18 yashtin 35 yashqiche bolghan aliy mektep oqughuchiliri we aspirantlar memuriy xadimliqqa qobul qilinidighan bolup, bularning ichide 833 nepiri türme sistémisigha qobul qilinidiken.

Bu qétim memuriy xadimliqqa qobul qilinidighanlargha yash cheklimisidin bashqa yene "Xitayning asasiy qanunini, wetenning birliki we milletler ittipaqliqini qoghdash, milliy bölgünchilikke we qanunsiz diniy pa'aliyetlerge qarshi turush" alahide telep qilin'ghan.

Mezkur uqturushta éytilishiche, bu qétim qobul qilinidighanlar herqaysi jaylardiki bingtu'enlerning memuri bashqurush sistémisida xizmet qilidighan bolup "Qobul qilinidighanlar éghizche we yéziqche imtihanlargha qatnishidu, axirida yüzturane söhbet arqiliq tallinidu" dep alahide we tepsiliy éytilghan. Beziler bu ehwalgha qarap bu qétim qobul qilinidighanlarning bir qeder muhim orunlargha qoyulidighanliqini perez qilmaqta.

Yillardin buyan Uyghurlar diyarida ishsiz yürüwatqan minglighan onminglighan Uyghur aliy mektep oqughuchiliri izchil kishilerning söhbet témiliridin bolup kelgen idi. Bezi mutexessisler "Dölet ichidiki dölet" dep teswirlewatqan bingtu'enlerning "Bosugha tüwi" diki Uyghur yashlirini emes, nechche ming kilométir nérisidiki xitay ölkiliridin memuri xadim we saqchi qobul qilishini "Ashkara irqchiliq qilghanliq" dep qarawatqanliqi melum.

Bu qétimqi memuriy xadim qobul qilishta yene zor sandiki namzatlarning türme sistémisigha qobul qilinishi nöwette Uyghurlar diyarida omumyüzlük dawam qiliwatqan basturush heriketliri bilen zich munasiwetlik bolushi mumkin, dep qaralmaqta.

Toluq bet