Ерик прәнсниң ширкити биңтуән билән тумшуқта мәшиқ мәркизи қуруш келишими имзалиған

Мухбиримиз әркин
2019-01-31
Елхәт
Пикир
Share
Принт

Америкиниң хоңкоңдики бир бихәтәрлик мулазимәт ширкити хитайниң «шинҗаң ишләпчиқириш-қурулуш биңтуәни» билән мәшиқ мәркизи қуруш келишими имзалиған.

Бурун америка армийәсиниң һәрбий мулазимәт ишлирини һөддигә елип кәлгән һөддигәр ерик прәнс «чегра мулазимәт гуруһи» намлиқ бу ширкәтниң қурғучилириниң бири. Униң бурунқи «қара су» намлиқ бихәтәрлик мулазимәт ширкити ирақ урушида бәзи йолсизлиқларға четилип тақиветилгән. Ерик прәнсниң өзи бурун америка армийәсиниң «деңиз йилпизи» алаһидә қисмида вәзипә өтигән икән.

Ройтерс агентлиқиниң 31‏-январ хәвәр қилишичә, униң «чегра мулазимәт гуруһи» баянат елан қилип, биңтуән билән мәшиқ мәркизи қуруш келишими имзалиғанлиқини билдүргән. Келишим мәзкур ширкәт билән биңтуәнниң тумшуқтики савху санаәт бағчиси оттурисида имзаланған. «Савху пахта тоқумичилиқ санаәт бағчиси» 2013‏-йилдин башлап қурулушқа башлиған. Униң ишләпчиқириш сехлириниң бир қисми 2017‏-йили 4‏-айда, қалған қисми 2018‏-йили 2‏-айда ишқа киришкән.

Мәзкур санаәт бағчиси хитай һөкүмитиниң 3 милйондәк уйғурни лагерларға қамап, униң бир қисмини һәр қайси җайлардики тоқумичилиқ санаәт бағчилирида мәҗбурий әмгәккә селиватқанлиқиға даир учурлар кәң тарқалған мәзгилдә ишқа киришкән иди. Ройтерс агентлиқиниң билдүрүшичә, «чегра мулазимәт ширкити» баянатта келишимниң 11‏-январ күни бейҗиңда имзаланғанлиқи, мурасимға тумшуқ шәһири вә «җоңшин гоән гуруһи чәклик ширкити» әмәлдарлириниң қатнашқанлиқини билдүргән болсиму, лекин келишимниң мәзмуни һәққидә һечқандақ учур бәрмигән.

«Чегра мулазимәт гуруһи» ниң уйғур районида мәшиқ мәркизи ечишни пиланлаватқанлиқиға даир хәвәрләр өткән йили тарқилип, бәзи кишилик һоқуқ тәшкилатлирида әндишә қозғиған иди. Улар хитай һөкүмити уйғурларни йиғивелиш лагерлириға қамап, уларға зулум қиливатқан бир вақитта бу ширкәтниң мәзкур районда мәшиқ мәркизи қуруп, хитайға бихәтәрлик хадимлирини тәрбийәләп беришиниң тоғра болмайдиғанлиқини илгири сүргән иди. Ройтерс агентлиқиниң ашкарилишичә, чегра мулазимәт гуруһи тумшуқтики мәшиқ мәркизигә 600 миң доллар мәбләғ салидикән. Хәвәрдә бу мәркәздә йилиға 8000 адәм тәрбийәләшкә болидиғанлиқини билдүргән.

Пикирләр (0)
Share
Толуқ бәт