Érik prensning shirkiti bingtu'en bilen tumshuqta meshiq merkizi qurush kélishimi imzalighan

Muxbirimiz erkin
2019-01-31
Élxet
Pikir
Share
Print

Amérikining xongkongdiki bir bixeterlik mulazimet shirkiti xitayning "Shinjang ishlepchiqirish-qurulush bingtu'eni" bilen meshiq merkizi qurush kélishimi imzalighan.

Burun amérika armiyesining herbiy mulazimet ishlirini höddige élip kelgen höddiger érik prens "Chégra mulazimet guruhi" namliq bu shirketning qurghuchilirining biri. Uning burunqi "Qara su" namliq bixeterlik mulazimet shirkiti iraq urushida bezi yolsizliqlargha chétilip taqiwétilgen. Érik prensning özi burun amérika armiyesining "Déngiz yilpizi" alahide qismida wezipe ötigen iken.

Roytérs agéntliqining 31‏-yanwar xewer qilishiche, uning "Chégra mulazimet guruhi" bayanat élan qilip, bingtu'en bilen meshiq merkizi qurush kélishimi imzalighanliqini bildürgen. Kélishim mezkur shirket bilen bingtu'enning tumshuqtiki sawxu sana'et baghchisi otturisida imzalan'ghan. "Sawxu paxta toqumichiliq sana'et baghchisi" 2013‏-yildin bashlap qurulushqa bashlighan. Uning ishlepchiqirish séxlirining bir qismi 2017‏-yili 4‏-ayda, qalghan qismi 2018‏-yili 2‏-ayda ishqa kirishken.

Mezkur sana'et baghchisi xitay hökümitining 3 milyondek Uyghurni lagérlargha qamap, uning bir qismini her qaysi jaylardiki toqumichiliq sana'et baghchilirida mejburiy emgekke séliwatqanliqigha da'ir uchurlar keng tarqalghan mezgilde ishqa kirishken idi. Roytérs agéntliqining bildürüshiche, "Chégra mulazimet shirkiti" bayanatta kélishimning 11‏-yanwar küni béyjingda imzalan'ghanliqi, murasimgha tumshuq shehiri we "Jongshin go'en guruhi cheklik shirkiti" emeldarlirining qatnashqanliqini bildürgen bolsimu, lékin kélishimning mezmuni heqqide héchqandaq uchur bermigen.

"Chégra mulazimet guruhi" ning Uyghur rayonida meshiq merkizi échishni pilanlawatqanliqigha da'ir xewerler ötken yili tarqilip, bezi kishilik hoquq teshkilatlirida endishe qozghighan idi. Ular xitay hökümiti Uyghurlarni yighiwélish lagérlirigha qamap, ulargha zulum qiliwatqan bir waqitta bu shirketning mezkur rayonda meshiq merkizi qurup, xitaygha bixeterlik xadimlirini terbiyelep bérishining toghra bolmaydighanliqini ilgiri sürgen idi. Roytérs agéntliqining ashkarilishiche, chégra mulazimet guruhi tumshuqtiki meshiq merkizige 600 ming dollar meblegh salidiken. Xewerde bu merkezde yiligha 8000 adem terbiyeleshke bolidighanliqini bildürgen.

Toluq bet