Xitayning génitik qorallarni tereqqiy qilduruwatqanliqi ilgiri sürüldi

Muxbirimiz erkin
2019-08-19
Élxet
Pikir
Share
Print

Ötken hepte amérikadiki "Mudapi'e bir" namliq torda élan qilin'ghan bir maqalide, xitay armiyesining génitik qorallarni tereqqiy qilduruwatqanliqi ilgiri sürülgen.

Maqalide qeyt qilinishiche, nöwette xitay azadliq armiyesi bu jehette xitay pen-tetqiqat sahesi bilen hemkarlashmaqtiken. Maqalide xitay azadliq armiyesining bu sahege bolghan qiziqishining istiratégiyelik tetqiqat doklatlirida eks étiliwatqanliqi, bu doklatlarda bi'ologiye sahesidiki tereqqiyat kelgüsidiki toqunushning shekli we xaraktérini békitishke türtke bolidu, dep qariliwatqanliqi tekitlen'gen. Maqalide, xitay merkizi herbiy ishlar komitétining 2016‏-yildin béri ménge tetqiqati, bi'omimétikiliq sistéma, bi'ologiyelik we bi'omimétikiliq matéri'allar hem insan iqtidari we shunche bi'otéxnilogiyesining "Yéngi nezeriyesi" qurulushigha meblegh ajratqanliqi tekitlinip, xitay herbiy da'irilirining bu sahege bolghan qiziqishi endishe qozghawatqanliqi bildürülgen.

Maqalide yene Uyghurlar tilgha élin'ghan bolup, xitay hökümitining dunyadiki eng chong gén ambiri bolghan "Döletlik gén bankisi" qurup chiqqanliqi, mezkur gén bankisining kaliforniye shtati we awstraliye qatarliq döletlerdiki tejribixanilar bilen alaqisi barliqi tekitlen'gen. Maqalide xitay "Döletlik gén bankisi" ning pa'aliyiti amérika dölet mejlisi ezalirini endishige séliwatqanliqi, xitay "Döletlik gén bankisi" ning kaliforniye uniwérsitéti, féladilfiye balilar doxturxanisi qatarliq orunlar bilen bir qatar hemkarliqlarda bolghanliqi bildürülgen.

"Mudapi'e bir" toridiki qoralliq bi'otéxnilogiye: xitay xitay armiyesi yéngi urush sahesige qandaq teyyarliq qiliwatidu?" serlewhilik maqalide yene, xitay "Döletlik gén bankisi" ning Uyghur rayonidiki tetqiqati we hemkarliqining bu rayondiki kishilik hoquq depsendichiliki bilen bolghan alaqisi, jümlidin mezkur rayondiki Uyghurlarning génétikiliq uchurini mejbur yighish qilmishi bilen bolghan alaqisining so'al peyda qilghanliqi bildürülgen.

Toluq bet