"Bir belwagh bir yol istratégiyesi" heqqide gumaniy qarashlar mewjut

Muxbirimiz jüme
2017-05-14
Élxet
Pikir
Share
Print

Xitay béjingda atalmish "Bir belwagh bir yol istratégiyesi" toghrisida aliy derijilikler uchrishishi ötküzüsh harpisida, bir qisim mutexessisler mezkur istratégiyening uzun muddet put tirep turalishidiki mumkinchilikke guman bilen qaraydighanliqini ilgiri sürülmekte.

Bu qarashlar jémistown fondi jem'iyiti 11-may élan qilghan bir mulahizide otturigha qoyuldi.

Xitay re'isi shi jinping 2015-yili küzde "Bir belwagh bir yol istratégiyesi" ni ashkarilap, xitayni yawropa, merkiziy asiya, sherqiy jenubiy asiya we ottura sherq ellirige tömür yol, déngiz we bashqa yollar arqiliq ulashni, shuning bilen xitayning tesir da'irisini kéngeytish ghayisini otturigha qoyghan.

Mulahizige qarighanda, shi jinping bir belwagh bir yol qurulushini biwasite nazaret qiliwatqan bolup, u, bu arqiliq xitayning dunya iqtisadiy yölinishini belgilesh iqtidarini ashurushni meqset qilghan. Melum bolushiche, shi jinping 15-may béyjingda échilidighan "Bir belwagh bir yol istratégiyesi" aliy derijilikler uchrishishida yuqiriqi ghayisi üchün diplomatik orun hazirlashqa tirishidiken.

Mulahizide körsitishiche, nöwette xitay axbarati mezkur istratégiyening ulughwarliqini hedep teshwiq qiliwatqan bolsimu, emma bir qisim xitay mutexessisler mezkur qurulush pilanigha so'al qoyushqa bashlighan.

Mulahizide neqil élip körsitishiche, xitay xelq uniwérsitéti xelq'ara munasiwetler mutexessisi shi yinxong shularning biri iken. U 2016-bu heqte élan qilghan bir parche maqaliside yuqiriki istratégiyening emelge éshishi we uni uzun muddet mangdurushqa bolghan gumanlirini otturigha qoyghan.

U, maqaliside xitay kommunist partiyesini mezkur istratégiyeni ijra qilghanda derijidin tashqiri kéngiyip kétip istratégiyelik onkol kélip chiqishning aldini élish üchün, buninggha alaqidar herbiy we iqtisadiy istratégiyede éhtiyatchan bolushqa chaqirghan.

Pul mu'amile waqit gézitide bu heqte élan qilin'ghan bir mulahizidimu, shi jinping bashlighan mezkur istratégiyening peqet bir yölinishlik soda éqimining tehditige uchraydighanliqini ilgiri sürgen.

Maqalide ilgiri sürüshiche, yawropa sodigerliri "Bir belwagh bir yol istratégiyesi" ning özlirigimu xitay bazirigha meblegh sélish pursiti yaritishini ümid qilsimu, emma xitaydiki cheklimiler tüpeyli ular közligendek netijige érishelmesliki mumkin iken.

Shu sewebtin mezkur istratégiye yawropaning xitaygha mal éksport qilish we meblegh sélishigha anche köp menpe'et élip kélelmeydiken.

Jémistown fondi jem'iyiti élan qilghan mulahizide körsitishiche yene, xitayning ottura asiyagha hessilep meblegh sélip, rayondiki iqtisadiy we diplomatik üstünlükke érishishi, sabiq sowétlar ittipaqi dewridin bashlapla mezkur ellerni siyasiy, herbiy we iqtisadiy jehettin monopol qilip kelgen rusiyenimu xapa qilip qoyidiken.

Mulahizilerde xulasilep körsitishiche, yuqiriqidek bir qanche türlük sewebler tüpeyli shi jinpingning mezkur istratégiyesi u kütkendek netije bermesliki mumkin iken.

Toluq bet