Xitayning "Bir belwagh, bir yol" xelq'araliq yighini jeryanida bixeterlik kücheytilgen

Muxbirimiz ümidwar
2017-05-14
Élxet
Pikir
Share
Print


Xitayning sahibxaliqidiki "Bir belwagh bir yol" xelq'araliq hemkarliq boyiche aliy derijilik bashliqlar munbiri 14-may küni béyjingda bashlandi.

Xitay da'irilirining teshwiq qilishiche, 29 dölet ali rehbiri we köpligen döletlerning wekilliri ishtirak qilghan mezkur xelq'araliq yighinning échilish nutqini xitay dölet re'isi shi jinping sözligen we yighinda yene bir qisim dölet rehberliri söz qilghan.

Xewerlerdin melum bolushiche, yighin jeryanida béyjing we bashqa her qaysi jaylardiki muqimliq hem bixeterlikni qoghdash tedbirliri, hoquq qoghdighuchi zatlarni qattiq nazaret qilish we bashqilar kücheytilgen.

Amérika awazining xewer qilishiche, hetta erzdarlarning béyjing shehirige kirip, pa'aliyet qilishighimu tosqunluq qilin'ghan shuningdek yene béyjingdiki bezi hoquq qoghdighuchi démokratik zatlirining torlargha chiqishi we sirtta pa'aliyet qilishi cheklimige uchrighan. Ene shundaq kishilerning biri béyjingdiki bir a'ile xristiyan chérkawining popi shü yongxeyning 8-maydin étibaren öz öyige nezerbend qilinishidur.

Bulardin bashqa yene herbiy septin qaytqan bir qisim kona herbiyler hem erizdarlarning dölet erzi-shikayet idarisigha bérishi tosup qoyulghan we bezi erizdarlar saqchilar teripidin élip kétilgen.

Bulardin bashqa yene xitay munasiwetlik organliri béyjingdiki mezkur xelq'araliq yighin jeryanida barliq xewer-uchur torliri, munazire sehipiliri, blog we ündidar shuningdek, xewer we widé'o tarqitish béketlirining mezkur xelq'araliq yighini heqqide tarqitidighan uchurliri döletning üch chong axbarat wasitisi, yeni, "Shinxu'a agéntliqi", "Xelq géziti" we "Merkizi téléwiziye istansisi"ni ölchem qilishini békitken.

Toluq bet