Pakistandiki "Bir belwagh bir yol" qurulushi yéngidin "Miq" qa üsti

Muxbirimiz eziz
2020-10-28
Share

Xitay hökümitining ghayet zor meblegh sélishi bilen bashlan'ghan "Bir belwagh bir yol" qurulushining muhim türliridin bolghan pakistandiki tömür yol qurulushi pakistan hökümitining ösüm nisbitini töwenlitish telipi ret qilin'ghanliqtin toxtap qaldi.

"Yaponiye iqtisad xewerliri" gézitining 28-öktebirdiki maqaliside körsitilshi'iche, pakistandiki "1-Ghol liniye tömür yol qurulushi" nöwette zor daghdugha bilen dawam qiliwatqan "Pakistan-xitay iqtisadiy karidori" berpa qilish xizmitidiki eng chong qurulush iken. 2655 Kilométir uzunluqtiki bu tömür yol qurulushi karachi bilen pishawur rayonini bir-birige baghlaydighan bolup, bu qurulushning omumiy tennerqini xitay hökümiti 6. 8 Milyard amérika dolliri dep bahalighan. Ikki terep imza qoyghan kélishimde "Bu mebleghning 10 pirsentini pakistan chiqiridu, qalghan 90 pirsentini xitay hökümiti pakistan'gha qerz béridu" dep békitilgen. Toxtamda bu qurulushning 2021-yili yanwar éyida resmiy ish bashlaydighanliqi éytilghan.

Nöwette xitaydin élinidighan ghayet zor qerzning ösüm nisbiti toghrisida pakistan hökümiti "Eng köp bolghanda bir pirsenttin éship ketse bolmaydu" dep ching turmaqta iken. Emma xitay hökümiti bolsa bu ösüm nisbitini "Bek töwen bolup qaldi" dep qarighanliqtin qerz resmiyetliri toxtap qalghan. Warshawadiki "Urush tetqiqat uniwérsitéti" ning tetqiqatchisi krizistow iwanék bu heqte söz qilip: "Xitay hökümiti herqachan mushu xildiki 'meblegh sélish' wasitisi bilen qoshna döletlerni qerz qapqinigha dessitip kelgen," dégen. Xelq'ara pul-mu'amile fondi pakistan hökümitige bir qétimda ikki yérim milyard amérika dolliridin köp qerz bermeslikni qarar qilghachqa, pakistanning chet eldin qerz élish imkaniyitimu cheklik bolmaqta iken. Halbuki, yene bir qisim iqtisadshunaslar bolsa "Xitay mushu xil wasite arqiliq pakistanni téximu sizghan siziqtin chiqmaydighan qilip qoymaqchi boluwatidu," déyishmekte iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.