Уйғур аптоном райони ташқи ишлар хизмитиниң нишанини “бир бәлвағ бир йол” яқисидики дөләтләргә қаритишни тәкитлигән

Уйғур аптоном районлуқ партком 2‏-декабир күни ташқи ишлар хизмәт йиғини чақирип, мәзкур районниң ташқи ишлар хизмитиниң нишанини нуқтилиқ әтраптики дөләтләргә вә “бир бәлвағ бир йол” яқисидики әлләргә қаритишни тәкитлигән.

Йиғинға аптоном районлуқ партком секретари чен чүәнго риясәтчилик қилған болуп, у ташқи ишлар хизмити хитайниң омумий дипломатик истратегийәси вә ташқи ишлар һәрикитигә маслишиши керәкликини илгири сүргән.

Мәзкур йиғин ғәрб дөләтлиридә хитай бирликсәп органлири вә аманлиқ даирилириниң муһаҗирәттики уйғурларға тәһдит селиш вә уларни контрол қилишқа урунуш һәрикити қаттиқ наразилиқ пәйда қилип, ғәрб һөкүмәтлириниң буниңға қарши күчлүк тәдбирләрни елиши тәләп қилиниватқан бир мәзгилдә чақирилған.

Уйғур шаһитлар вә хәлқара кишилик һоқуқ тәшкилатлириниң илгири сүрүшичә, хитайниң йәрлик аманлиқ органлири вә ташқи ишлар даирилири ғәрб әллиридә олтурушлуқ уйғурларниң юртидики ата-ана, уруқ-туғқанлирини гөрүгә тутуп, улар арқилиқ муһаҗирәттики уйғурларни контрол қилишқа урунуп кәлгән.

Өткән һәптә әнглийәдики “муһапизәтчи” гезити хитай даирилириниң австралийәдики уйғурларға қандақ тәһдит вә паракәндичиликләрни селиватқанлиқи, уларни контрол қилишқа урунуватқанлиқини ашкарилиған. Хитайниң бу һәрикити йеқиндин бери бәзи ғәрб дөләтлиридики парламент әзалириниң диққитини қозғиған.

Бәзи парламент әзалири һөкүмәтниң тәдбир қоллинип, уйғурларни қоғдишини тәләп қилған иди. 2‏-Декабир күни өткүзүлгән уйғур аптоном районлуқ ташқи ишлар хизмәт комитетиниң йиғинида униң муһаҗирәттики уйғурларға қарита йәнә қандақ конкрет сиясәтләрни бекиткәнлики мәлум әмәс. Бу йиғинда “мәркәзниң йәрлик ташқи ишлар хизмити рәһбәрлик қурулмисини ислаһ қилишни күчәйтиш қарарини иҗра қилиш чариси”, “аптоном район партком ташқи ишлар комитетиниң йеңи дәврдики аптоном район ташқи ишлар хизмитини бир туташ иҗра қилиш чариси” қатарлиқ 4 хил һөҗҗәт мақулланған.