Bishkektiki bir xitay réstorani bulangchiliqqa uchridi

Muxbirimiz erkin
2017-02-07
Élxet
Pikir
Share
Print

Qirghizistan paytexti bishkek shehiridiki bir xitay réstorani 6‏-féwral qoralliq bulangchiliqqa uchrap, ikki xitay yénik yarilan'ghan. Qirghizistan ichki ishlar ministirliqining qirghiz axbarat wasitilirige ashkarilishiche, yüzige maska tartiwalghan qoralliq kishiler bishkek waqti kech sa'et 10:00 gha az qalghanda réstoran'gha basturup kirgen.

Qoralliq kishiler réstoran'gha basturup kirip oq chiqarghan hem 10 minut ichide réstoran kassisidiki 100 ming som pul, bir xitay ayalning üzüki qatarliq nersilerni bulap chiqip ketken.

Qirghizistan axbarat wasitilirining shahitlardin neqil keltürüp bergen xewerliride yene, qoralliq kishilerning réstoran ayrimxanisigha kirip, bu yerde tamaq yewatqanlar xéridarlarni yerge yatquzup qoyghanliqi, shahitlardin birining qoralliq kishilerni "Rus tilida sözleytti, emma qirghizlardek qilatti" dégenlikini bildürdi.

Qirghizistan axbarat agéntliqi ‏- "Xewer"ning qeyt qilishiche, weqedin kéyin saqchilar neq meydan'gha yétip kélip, tekshürüsh élip barghan hem neq meydandin 43 pay pistan tapqan. Saqchilar bu weqeni jinayi ishlar délosi, dep békitip, réstorandiki 4 sin'alghu kamirani söküp élip ketken.

Qirghizistan amanliq organliri hazirgha qeder qoralliqlarning xitay réstoranini nishan'gha élishtiki meqsiti heqqide héchqandaq bayanda bolup baqmidi. Közetküchilerning qeyt qilishiche, yéqinqi waqitlardin béri, xitayning qirghizistandiki tesiri téz kéngeygen. Netijide bu, qirghiz puqraliridiki xitaygha qarshi naraziliqni kücheytken.

Toluq bet