Da'iriler ürümchide “Bölgünchilikke qarshi” siyasiy telem-terbiyini kücheytti

22-May küni ürümchide “Bölgünchilikke qarshi turush telim-terbiye yighini” échilghan bolup, yighinda shinjang uniwérsitéti filologiye institutining proféssori gu'en shushin “Shinjang ezeldin köp milletler arilash olturaqlashqan rayon” dégen témida mexsus doklat bergen.

Xitayning hökümet metbu'atlirida, bu doklatning Uyghur élining muqim, tinch tereqqiyatida muhim ehmiyetke ige ikenliki alahide tekitlendi. Emma Uyghur biz torining ziyaritini qobul qilghan ürümchi ahalisi bundaq doklatlarning yéqinqi yillardin buyan barghanche köpiyiwatqanliqini bildürüp, bu xil doklatlarni“Ménge yuyush doklati” dep mesxire qilghan. Uyghur weziyitini közetküchiler bolsa, bu qétimqi yighinning ötken ayda jenubiy Uyghur élide yüz bergen “Hökümet xadimlirining öy axturush” igha qarshi, xitay saqchiliri we hökümet kadirlirigha pichaq bilen hujum qilish weqeliri yeni, 23-aprél maralbéshi weqesi, 9-may yéngisar weqesi we 10-aprél aqsu awat weqeliridin kéyin, da'irilerning qarshiliq barghanche küchiyiwatqan Uyghur éli weziyitidin ensirishining muhim ipadisi ikenlikini ilgiri sürmekte.

Gogul toridin izdigen uchurlardin melum bolushiche, da'iriler 2010-yildin buyan her yili 5-ayning axiri oxshash témidiki doklat bérish yighini uyushturup kelgen. Her qétimqi doklatta Uyghur aptonom rayonining ezeldin xitayning ayrilmas bir qismi ikenliki hem tarixtin buyan bu zéminda köpligen milletlerning ariliship yashap kelgenliki tekitlinip, milliy bölgünchilerge qarshi turush kürishini axirghiche dawamlashturush terghib qilin'ghan mezmunlar doklatning asasiy témisi bolghan.