Qazaq boks mahiri qanat islam florida boks boyiche chémpiyon boldi

Muxbirimiz ümidwar
2017-05-29
Élxet
Pikir
Share
Print


Qazaqistan metbu'atliri Uyghur diyarining altay wilayitide tughulup, köp yillar Uyghur diyaridiki boks komandisining ezasi bolghan qazaq boks mahiri qanat islamning 27-may küni amérikining florida shitatining boka-reyton shehiride ötküzülgen bir boks musabiqiside riqabetchisini yéngip, netije qazan'ghanliqini tushmu-tushtin xewer qildi.

""Qazaqistan" téléwiziyesi bolsa qanat islamning musabiqe ehwalini neq meydandin pütün qazaqistan'gha tarqatti.

Florida ötküzülgen bu kespi boks musabiqiside 69 kilogramliq qanat islam méksikiliq boks mahiri norbérto gonsalésani yéngip, bu qétimliq musabiqining chémpiyonluqini qolgha keltürgen.

Qazaqistan metbu'atlirining yézishiche, nöwette qanat islam qazaqistanliqlar pexirlinidighan boks mahirigha aylan'ghan bolup, u 2011-yilidin étibaren xitay puqraliqidin waz kéchip, qazaqistan puqraliqigha ötken we 2012-yilidin buyan amérikining florida shtatidiki bir boks kulubida da'im turup meshq qilmaqta. Qanat islam bu yerdiki boks musabiqiliride öz netijiliri arqiliq qazaqistan bayriqining kötirilishini qolgha keltürmekte.

33 Yashliq qanat islam 1984-yili, Uyghur rayonining altay wilayitide qazaq ziyaliysi a'iliside tughulghan bolup, uning akisi ürümchidiki Uyghur aptonom rayonluq boks komandisining ezasi bolghan. Qanat islam akisining tesiri astida boks mahiri bolup, yétiship 1997-yili ürümchige kélip, boks komandisigha kirip, ataqliq meshqawul ablikim abduréshitning biwasite terbiyeside meshiq qilip, téz közge körün'gen we 2005-yili hem 2007-yili xitay boyiche chémpiyon bolghan, 2008-yili béyjing olimpik musabiqisige qatniship, mis médalgha érishken.

Qanat islam 2010-yili, xitay dölet komandisining ezaliqidin waz kéchip qazaqistan'gha yerleshken we 2011-yili xitay puqraliqidin waz kéchip, qazaqistan grazhdani bolghan idi. Hazir u qazaqistan boks mahiri hésablinidu.

Toluq bet