Bulghariye saqchiliri 71jeset bilen bayqalghan yük aptomobiligha chétishliq 4 ademni qolgha alghan

Muxbirimiz jüme
2015-08-29
Share


Xewerlerge qarighanda 28 - awghust bulghariye saqchi da'iriliri awstriyede 71 ademning jesiti bilen bayqalghan yük aptomobiligha chétishliq 4 ademni qolgha alghan.

Bularning üchi bulghariyelik, biri afghanistanliq bolup, bularning arisida mezkur yük aptomobilining shopurimu bar iken.

27 - Awghust awstriye da'iriliri bolghariyedin wéna sheherige baridighan yolning awstriye bölikide ichide 71 ademning jesiti sésip ketken bir yük aptomobilini bayqighan. Bularning 59 nepiri er, 8 nepiri ayal 4 nepiri kichik bala iken.

Mezkur xewer ashkarilan'ghandin kéyin dunya xaraktérlik inkas qozghighan idi. Melum bolushiche, qazagha uchrighanlar esli wén'giriyening budapésht shehiridin yolgha chiqqan we bulghariye arqiliq charshenbe küni awstriye chégrasigha kirgen.

Aptomobil awstriye chégrasigha kirgende yeni ne'usédl we parndorf shehiri arisida tashlap kétilgen. Peyshenbe küni awstriye saqchiliri mashina ichidin sésishqa bashlighan jesetlerni bayqighan.

Melum bolushiche, qazagha uchrighuchilarning bir qisimlirining qolida süriyedin alghan yol xéti bar bolup, bashqilarning kimliki hazirche éniqlanmighan.

Saqchilar bu bextsizlerning awstriye chégrasigha kirishtin ilgirila jan üzüp bolghanliqini texmin qilishqan.

Metbu'atlarda buning yéqini aylardin buyan yawropada köplep yüz bériwatqan musapirlar krizisining neqeder jiddiylikni körsitidighanliqi bildürülgen.

Bulghariye da'iriliri nöwette mezkur paji'ege chétilghan aptomobil we adem qachaqliqigha munasiwetlik kishilerni tutup soraq qilishqa bashlighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet