"BuzzFeed" xewerler tori Uyghur élide lagérlarning dawamliq kéngeytiliwatqanliqini ashkarilidi

Muxbirimiz irade
2020-08-27
Élxet
Pikir
Share
Print

27-Awghust küni "BuzzFeed" xewerler tori Uyghur élidiki lagérlar heqqide yéngi tekshürüsh maqalisi élan qildi. Mezkur maqalide, gugul sün'iy hemrah körünüshliri üstidin ep bérilghan tekshürüsh we lagér shahidlirini ziyaret qilish netijiside, 2017-yildin buyan rayonda yasalghan 260 din artuq lagér qurulushi tépip chiqilghan.

Ularning bayqishiche, Uyghur élidiki herbir nahiyede birdin dégüdek lagér bar bolup, bu 3 yil mabeynide xitay hökümiti lagérlarni toxtimay kéngeytip, 2-dunya urushidin buyanqi melum bir milletke qaritilghan eng zor tutqunni emeliyleshtürgen.

Ularning bayqishiche, xitay da'iriliri deslepte kona mektep binaliri we hökümet binalirini tutup turush orni qilip ishletken bolsa, kéyin tutqun kölimining kéngiyishi netijiside 6 ayghimu yetmigen waqit ichide zor kölemlik lagér qurulushlirini bina qilip chiqqan. Bundin sirt yene, lagér ichide zawut-karxana qurulushlirimu köplep ep bérilghan bolup, u mejburiy emgekning keng da'iride yolgha qoyuluwatqanliqidin dérek béridiken. Diqqet qozghaydighini, bu qurulushlar dawamliq sélinmaqtiken.

Ularning bayqishiche, 2019-yilining béshida, ishchilar ürümchining jenubidiki dawanchinggha jaylashqan lagérni kéngeytish üchün yer tazilashqa bashlighan. Dawanchingdiki lagér eslidila chong lagérlarning biri bolup, u 2018-yili öktebirde 32 ming 500 adem sighidighan kölemge ige bolsa, kéyin qoshulghan ikki lagér binasi sayiside u sighimi 40ming kishidin ashidighan lagérgha aylandurulghaniken.

Amérikaning "BuzzFeed" xewerler torining bu yéngi doklati élan qilin'ghandin kéyin zor inkas qozghidi.

Toluq bet