Chaghan harpisida ürümchi poyiz istansisi köchmen xitay yoluchiliri bilen tolghan

Muxbirimiz qutlan
2017-01-28
Élxet
Pikir
Share
Print


Melum bolushiche, chaghan harpisida ürümchi tömüryol idarisining jenubiy wogzali bilen shimaliy wogzali köchmen xitay yoluchilirining köplikidin adem déngizigha aylan'ghan.

Xelq torining bu heqtiki xewiride körsitilishiche, ürümchi tömüryol idarisining jenubiy wogzali bilen shimaliy wogzali 22-yanwardin 26-yanwarghiche künige 50 mingdin artuq yolichini yolgha salmaqtiken.

Xewerde déyilishiche, ürümchi wogzalining 25-yanwar bir kün ichide yolgha salghan yoluchi sani 57 mingdin ashqan bolup, bu ürümchi wogzali qurulghandin buyan eng köp yoluchi uzatqan bir kün iken.

Ürümchi arqiliq xitayning ichkiy ölkilirige yaki Uyghur aptonom rayonining herqaysiy jaylirigha chaghan ötküzgili mangghan yüzminglighan xitay köchmenliri wogzallarni adem déngizigha aylandurghan iken.

Uyghur élidin kelgen xewerlerde chaghan harpisi kélishi bilen meyli ayrupilanda bolsun yaki poyizda bolsun xitay yoluchilirining köplikidin Uyghurlarning körünmey qalghanliqini ilgiri sürmekte.

Melumki, yéqinqi birqanche yil ichide ürümchi shehiri eslidiki nopusi aran bir milyundin ashidighan otturihal derijilik sheherdin köchme ahale bilen qoshup hésablighanda 5 milyun nopusluq bir chong sheherge aylan'ghan.

Közetküchiler, Uyghur diyaridiki adem yashighili bolidighan bostanliq kölimining intayin tar ikenlikini, jenubiy Uyghur élining bostanliqliridiki ahale zichliqining hetta shangxey shehiridinmu yoqiri ikenlikini, shuninggha qarimay xitay hökümitining nöwette Uyghur éligha xuddi seldek köchmen yötkewatqanliqini eskertmekte.

Toluq bet